Путин Трампга 2 ой ичида Украинадаги ҳужумларни кучайтиришини айтди – ОАВ

Россия яқин икки ой ичида Украинадаги ҳужумларини кучайтириш ниятида. Бу ҳақда Россия етакчиси Владимир Путин ва АҚШ Президенти Дональд Трампнинг яқинда бўлиб ўтган суҳбати тафсилотларига таяниб, “Axios” хабар берди.

Нашрнинг ёзишича, Путин АҚШ Президентига “келгуси 60 кун ичида Россия муҳим мавқега эга бўлган Украина вилоятлари маъмурий чегараларигача бўлган ҳудудларни босиб олиш учун янги ҳаракатларни амалга оширишини” айтган.

Манбаларга кўра, Трампнинг ўзи суҳбатнинг шундай тафсилотларини Франция Президенти Эммануэль Макрон билан шахсий суҳбатида айтган.

“У ҳамма нарсани олишни хоҳлайди”, деган Трамп Макронга.

Айнан шу суҳбатдан кейин Америка Президенти Путинни фаол танқид қила бошлади ва Украинага янги қуроллар етказиб беришга қарор қилди.

Қайд этиш жоиз, кеча, 13 июль куни АҚШ Президенти Дональд Трамп Мэриленд штатидаги Эндрюс қўшма базасида Қўшма Штатлар Patriot ҳаво мудофаа тизимларини Украинага топширишини маълум қилди.

Эслатиб ўтамиз, 12 июль куни “Axios” нашри Путин америкалик мавқедоши Дональд Трампга ҳам, Эрон расмийларига ҳам Теҳрон уранни бойитишдан бутунлай воз кечиши ҳақидаги келишув ғоясини қўллаб-қувватлашини айтганини хабар қилганди. Нашрнинг ёзишича, Путин сўнгги бир неча ҳафта ичида Теҳронга шундай мурожаат билан “қайта-қайта” боғланган ва бундан Исроил расмийлари ҳам хабардор бўлган. Бироқ кеча, 13 июль куни Россия Ташқи ишлар вазирлиги “Axios” нашрининг Россия Президенти Владимир Путин АҚШ билан янги “ядровий битим” тузиш учун Эронни уранни бойитишдан воз кечишга яширинча чақиргани ҳақидаги мақоласини “мақсадли дезинформация” деб атади.