Путин Трамп соғайиб кетиши учун ибодат қилган – Уиткофф (видео)

Россия Президенти Владимир Путин 2024 йил июль ойида сайловолди ташвиқоти чоғида уюштирилган суиқасдда жароҳатланган “дўсти” Дональд Трамп учун ибодат қилган. Шунингдек, Путин АҚШ Президентига россиялик номаълум рассом томонидан чизилган портретини совға қилган. Бу ҳақда Трампнинг Яқин Шарқ бўйича махсус вакили Стив Уиткофф журналист Такер Карлсон билан суҳбатда маълум қилди.

“Трампга ўқ узилганида, у (Путин) маҳаллий черковга бориб, руҳоний билан учрашган ва Президент учун ибодат қилган. У Трамп АҚШ Президенти бўлгани ёки яна Президент бўлиши мумкинлиги сабабли, балки улар дўст бўлгани учун, у дўсти учун ибодат қилган”, дейди Трампнинг махсус вакили.

Уиткоффнинг сўзларига кўра, Путин Трампга Россиянинг машҳур рассомларидан бири томонидан чизилган портретни ҳам совға қилган.

“Биласизми, ҳаммаси (Путин ва Трамп ўртасидаги муносабатлар) шахсий даражага ўтиб кетди. Президент Путин Россиянинг етакчи рассомидан Президент Трампнинг ажойиб портретини тайёрлашни буюртма қилган”, деди Уиткофф.

Унга кўра, АҚШ Президенти бу совғадан “шубҳасиз таъсирланган”. Уиткофф, шунингдек, Путинни “жуда ақлли” деб атаб, КГБ ҳақида гапирган.

“КГБга фақат Совет Иттифоқининг энг зукко одамлари қабул қилинган”, деди у.

Бундан ташқари, махсус вакил Путин ва Трампнинг учрашуви “яқин ойларда” бўлиб ўтиши мумкинлигини ҳам таъкидлаган. Унинг фикрича, икки Президентнинг олдинги музокараларини муваффақиятсиз деб баҳолаш “бемаънилик”.

north_east

Путин Трампнинг одамини узоқ куттирган – ОАВ

Уиткофф интервью давомида келажакдаги тинчлик келишувининг асосий масаласи Россия томонидан босиб олинган Украина ҳудудларининг мақоми эканини ҳам таъкидлаган. У Россия назоратидаги Донецк, Луганск, Херсон ва Запорожье вилоятлари ҳамда аннексия қилинган Қрим аҳолиси Москва ҳукмронлиги остида қолишга қарши эмас.

Эслатиб ўтамиз, 2024 йил 13 июль куни Дональд Трампга Пенсильваниядаги тарафдорлари билан учрашув вақтида номаълум шахс томонидан ўқ узилиб, суиқасд уюштирилган эди. Трамп ўшанда ўнг қулоғидан ярадор бўлган. Ўқ узган одам ва митинг қатнашчиси ҳалок бўлган, яна икки киши ярадор бўлган. Шундай қилиб, Трампга қилинган суиқасд 1981 йилда АҚШнинг собиқ президенти Рональд Рейганга ўқ узилганидан бери президент ёки президентликка номзодга суиқасд уюштиришга қаратилган энг жиддий уриниш бўлганди.