Путин тез орада ўлади – Зеленский

Украина Президенти Владимир Зеленский журналистларнинг Россия раҳбари олдидаги устунликлари ҳақида саволига жавоб берар экан, унинг тез орада ўлишини таъкидлади. Бу ҳақда “Страна” хабар берди.

“Путин тез орада ўлади, бу ҳақиқат. Ва унинг тинч ва омадсиз тарихий ҳаёти ниҳоясига етади”, деди Украина Президенти жамоат телеканалларига берган интервьюсида.

Россия Президенти олдидаги устунликлари ҳақида сўз юритаркан, Зеленский ўз ёшини устунлик сифатида келтирган.

“Мен Путин билан солиштирганда ёшман, менга пул тикаверинглар. Менинг истиқболим яхшироқ”, дея қўшимча қилган Зеленский.

Нашрнинг ёзишича, бундан аввал ҳам Зеленский Ғарб ОАВга берган интервьюсида “Путиннинг тез орада ўлиши” ҳақида гапирган.

“Мен ҳаётни ва эркинликни яхши кўраман. Шу сабаб мен эркинлик учун курашмоқдаман. Менда вақт бор, лекин унда (Путинда) йўқ. У албатта тез орада ўлади. Лекин мен ҳали яшашни, юришни хоҳлайман. Сиёсатдан кейин дунёни кезиш қизиқ бўлади. У эса бундай имкониятга эга эмас”, деган ўшанда Украина Президенти.

Шунга ўхшаш баёнот Зеленский томонидан Netflix’нинг “Менинг кейинги меҳмоним таништиришга муҳтож эмас” дастуридаги махсус сонда ҳам айтилган.

Ўшанда Зеленский агар Владимир Путин ўлса, Россиянинг Украинага қарши уруши ҳам тугашини, чунки Россия институтлари фаолияти тўхташини ва сиёсатчилар ички муаммолар билан банд бўлиб қолишини айтган. Шунингдек, у Россия Президенти ўлимдан қўрқишини, шу боис Украинада ядро қуролидан фойдаланмаслигини ҳам таъкидлаган.

“Мен унинг яшаш истагини кўрганман, у ҳаётни жуда яхши кўради. У ҳатто узун стол ортида ўтиради, COVID ёки бошқа касалликларга чалинишдан қўрқади. Бу эса унинг ўлимдан қўрқишини ва ҳаётни севишини англатади. Мен у ядро қуролини қўллашга тайёр эканига ишонмайман”, деган Украина Президенти.

Маълумот ўрнида, Россия етакчиси Владимир Путинга ҳозирда 72 ёш, Украина етакчиси Владимир Зеленский эса 47 ёшда экани келтирилган.