Путин Сталиннинг қарорини тиклади

Россия Президенти Владимир Путин 10 ва ундан ортиқ бола туғиб, вояга етказганларга “Қаҳрамон она” унвонини таъсис этиб, улар учун 1 миллион рубль миқдорида бир марталик тўлов белгилади. Фармон кеча, 15 август куни ҳуқуқий ахборотнинг расмий порталида эълон қилинди.

“Россия Федерацияси фуқароси бўлган 10 ва ундан ортиқ болани туғган ва тарбиялаган онага “Қаҳрамон она” унвони белгилансин”, дейилади ҳужжатда.

Қайд этилишича, унвонни беришда 1 миллион рубль миқдорида пул мукофотидан ташқари диплом ва “Қаҳрамон она” ордени ҳам берилади.

“Алоҳида ажралиб турадиган кўкрак нишони олмос ва эмалли тилладан ясалган “Қаҳрамон она” ордени ҳисобланади. Бу олтин ва родий штрал шаклида нурларга эга бўлган беш қиррали юлдуздир. Юлдузнинг марказида Россия Федерацияси Давлат гербининг уч ўлчамли тасвири бўлган, қизил эмаль билан қопланган ва “Қаҳрамон Она”қавариқ ёзуви бўлган думалоқ медальон жойлашган”, дейилади ҳужжатда.

Худди шу фармон билан Президент “Ота-она шон-шарафи” ордени билан тақдирланганда, тақдирланган ота-оналардан бирига 500 000 рубль миқдорида бир марталик рағбатлантириш, “Ота-она шон-шарафи” медали билан тақдирлашда эса 200 000 рубль миқдорида бир марталик рағбатлантириш тўланишини белгилади.

Июнь ойи ўрталарида Россия Президенти Владимир Путин СССР даврида мавжуд бўлган “Қаҳрамон она” фахрий унвонини қайта тиклашни назарда тутувчи фармон лойиҳасини тайёрлашга буйруқ бергани хабар қилинганди. 

“Қаҳрамон она” медали Иосиф Сталин даврида СССР Олий Кенгаши Президиумининг 1944 йил 8 июлдаги қарори билан таъсис этилган. “Қаҳрамон она” унвони тўғрисидаги низомга кўра, орден 10 ва ундан ортиқ бола туғган ва тарбиялаган оналарга берилган. 

"Қаҳрамон она" унвони Совет Иттифоқининг энг юқори даражаси бўлиб, болалар туғилиши ва тарбиясидаги хизматлари учун аёлларга берилар эди. Эътиборлиси, бу унвон миллионлаб инсонларнинг ҳаётига зомин бўлган Иккинчи жаҳон уруши йилларида таъсис этилган. Фронтларда ҳалок бўлган эркакларнинг аксарияти ёшлар ва ўрта ёшлилар эди. Мамлакат аҳолиси сезиларли даражада камайди. “Қаҳрамон она” унвони ва шу номдаги орденнинг киритилиши мамлакатга ўша даврда ёшлар, коммунизм қурувчиларининг янги авлоди нақадар зарур эканлигини кўрсатди. 

"Қаҳрамон она" фахрий унвони биринчи марта СССР Олий Кенгаши Президиумининг 1944 йил 27 октябрдаги Фармони билан берилган. Мазкур Фармон билан “Қаҳрамон она” унвони билан тақдирланган ўн тўрт нафар аёл орасида 1-сонли “Қаҳрамон она” ордени ва СССР Олий Кенгаши Президиумининг 1-сонли дипломи 12 болани тарбиялаган Москва вилояти, Мамонтовка қишлоғидан резидент Алексахина Анна Савельевна тақдирланди. Мукофот унга 1944 йил 1 ноябрда Кремлда топширилган. 

СССР тарихида охирги марта "Қаҳрамон она" унвонини бериш СССР Президентининг 1991 йил 14 ноябрдаги фармонига мувофиқ амалга оширилди. 

1995 йил 1 январь ҳолатига кўра, 431 мингга яқин аёл “Қаҳрамон она” ордени билан тақдирланган.