Энди Россияда Совет халқи геноциди қурбонлари хотирланади

Россия Президенти Владимир Путин Совет халқи геноциди қурбонларини хотирлаш кунини белгилаш тўғрисидаги қонунни имзолади. Бу ҳақда РИА Hовости хабар берди.

Қайд этилишича, мазкур Қонунга мувофиқ, 19 апрель Совет халқи геноциди қурбонларини хотирлаш куни сифатида нишонланади. Ушбу сана Иккинчи жаҳон уруши йилларида босиб олинган ҳудудларда нацистлар ва уларнинг ҳамкорлари томонидан совет фуқароларига қарши содир этилган жиноятлар ҳақидаги тарихий ҳақиқатни сақлаб қолишни мақсад қилади.

Айнан 1943 йил 19 апрель куни СССР Олий Кенгаши Президиумининг 39-сонли фармони қабул қилинган. Унда совет фуқароларини ўлдириш ва қийноққа солишда айбдор бўлган немис-фашист жиноятчилари, шунингдек, асирга олинган Қизил Армия аскарлари, жосуслар, совет фуқаролари орасидан чиққан ватан хоинлари ва уларнинг шерикларини жазолаш чоралари белгилаб қўйилган.

Маълум қилинишича, мазкур қонун Давлат Думаси томонидан 2025 йил 16 декабрь куни биринчи ўқишда қабул қилинган. Ҳужжат 2026 йил 1 январдан кучга киради.

Давлат Думаси спикери Вячеслав Володиннинг сўзларига кўра, “бутун дунёни нацистлар қўлидан қутқарган фидоийларнинг қаҳрамонлик хотирасини асраб-авайлаш бурч ҳисобланади”. 

Володин бошқа мамлакатларнинг “нацистлар томонидан содир этилган ваҳшийликлар ва совет халқининг қаҳрамонлиги ҳақидаги ҳақиқатни унутишига йўл қўймаслик лозим”лигини таъкидлади. У Иккинчи жаҳон уруши даврида ҳеч бир мамлакат совет халқи каби улкан қурбонликларга дуч келмаганини эслатиб ўтди.

Шунингдек, Россияда 2025 йилда ушбу санага бағишланган “Муддатсиз” номли кенг кўламли маърифий лойиҳа ҳам бошланган. Лойиҳа доирасида архив ҳужжатларини махфийликдан чиқариш, қидирув-дала ишларини олиб бориш, таълимий тадбирлар ҳамда илмий-амалий конференциялар ўтказиш режалаштирилган.

Эслатиб ўтамиз, аввалроқ Россия янги купюрани муомалага киритгани ҳақида хабар берилганди.