Путин Истанбулга келмаса, санкцияларни кучайтириш керак – Зеленский

Украина Президенти Владимир Зеленский Россия ва Украина музокаралар олиб борадиган Истанбулга сафари олдидан Киев Россия Президенти Владимир Путин билан музокара олиб боришга ҳаракат қилаётганини айтди. Бу ҳақда у бугун, 13 май куни сўз очди.

“Биз бу учрашув бўлиши учун ҳамма нарсани қиламиз. Агар Путин ҳақиқатан ҳам нафақат ОАВда, балки реал ҳаётда учрашишга тайёр бўлса. Ва кейин, раҳбарият даражасида, биз ўт очишни тўхтатиш бўйича келишиш учун ҳамма нарсани қиламиз. Чунки айнан у билан ўт очишни тўхтатиш бўйича музокаралар олиб боришим керак. Чунки буни фақат ўзи ҳал қилади”, деди Зеленский.

Украина Президентининг сўзларига кўра, Киев АҚШ Президенти Дональд Трампга Истанбулдаги музокараларга қўшилишни таклиф қилган.

“Мен Америка Қўшма Штатлари Президентининг қарорини билмайман, лекин ҳар ҳолда, агар у ўз иштирокини тасдиқласа, бу Путиннинг учиб келишига қўшимча туртки бўларди, деб ўйлайман”, дейди Зеленский.

Украина Президенти яна Кремлнинг урушни тугатиш истагига ишонмаслигини айтди. Унинг фикрича, Путин ўт очишни тўхтатиш ёки бирон-бир музокарани истамайди ва Зеленский билан тўғридан тўғри музокара қилишдан қўрқади.

Зеленский, агар Путин Истанбулга учмаса, Украина иттифоқчиларидан “энг кучли санкциялар пакетини” кутаётганини айтди. Украина Президентининг сўзларига кўра, Путиннинг Истанбулга келмаслиги “унинг урушнинг тугашига тайёр эмаслигини намойиш қилишнинг якуний нуқтаси бўлади”.

“Бу АҚШ, Европа ва бошқа давлатлар раҳбарларининг барча ваъдалари, қатъий ва аниқ ваъдалари бажарилиши кераклигини англатади. Акс ҳолда, сиз Россияни қадам ташлашга мажбурламайсиз. Ва бу энди тажовуз, ишғол ва шунга ўхшашлар учун санкциялар эмас. Яъни, аллақачон бир миллион муроса мавжуд. Бу санкциялар улар ҳатто ўт очишни тўхтатишни ҳам хоҳламагани учун бўлиши, энг кучли санкциялар пакети бўлиши керак”, деди Зеленский.

Истанбулда Россия ва Украина музокаралари

Путиннинг ўзи 15 май куни Украина томонидан Европа Иттифоқи ва АҚШ кўмагида таклиф қилинган 30 кунлик сулҳга муқобил равишда Истанбулда тўғридан тўғри музокараларни қайта бошлаш ғояси билан чиқди. Бунга жавобан Зеленский Туркияга келишини, фақат Россия раҳбари билан шахсан учрашишини айтди.

Кремль ҳозирча музокараларда Россиядан ким вакиллик қилишини ва Путин иштирок этиши мумкинлигини эълон қилгани йўқ.

Россия Президенти матбуот котиби Дмитрий Песковнинг сўзларига кўра, Россия Украина билан музокараларга тайёргарлик кўришда давом этмоқда.