Путин Эрдўғанга газ хабини яратиш ва нархни белгилашни таклиф қилди

Россия Президенти Владимир Путиннинг фикрича, Туркияда ташкил этиш таклиф этилаётган газ хаби газ нархини аниқлаш платформасига айланиши мумкин, бу эса бу масалани сиёсийлаштиришни истисно қилади. Бу ҳақда Путин бугун, 13 октябрь куни Остонада Президент Ражаб Тойиб Эрдўған билан яккама-якка учрашувда сўз очди. 

“Биз биргаликда яратишимиз мумкин бўлган ушбу марказ фаолияти давомида, албатта, бу нафақат таъминот, балки нархни аниқлаш учун платформа бўлар эди, чунки бу жуда муҳим масала – нархлаш масаласи”, дейди Путин. 

Путинга кўра, бугунги кунда нархлар ҳаддан ташқари қиммат.

“Биз уларни ҳеч қандай сиёсий оҳангларсиз оддий бозор даражасида осонгина тартибга солишимиз мумкин”, дея қўшимча қилган Россия раҳбари. 

Россия Федерацияси Президентининг айтишича, 12 октябрь куни Москвада бўлиб ўтган “Россия энергетика ҳафталиги” форумида Туркия энергетика вазири, “Ботас” ва “Газпром” раҳбарияти билан маслаҳатлашувлар ўтказилган. 

“Мен буни очиқ айтдим: агар Туркияга ва бошқа мамлакатлардаги потенциал харидорларга қизиқиш бўлса, [биз] бошқа газ қувурлари тизимини қуриш ва Туркияда бошқа давлатларга, биринчи навбатда учинчи давлатларга сотиш учун газ марказини яратишни кўриб чиқишимиз мумкин. Албатта, европаликларга, агар улар бундан манфаатдор бўлсалар, албатта”, деб эслади Россия раҳбари. 

Россия Президентининг матбуот котиби Дмитрий Песковга кўра, Туркия Президенти Путиннинг республикада газ хабини яратиш таклифига жуда ижобий баҳо берди. 

“Мавзу жуда ижобий қабул қилинди. Бу биргаликда ишлаб чиқилади”, дейди у Эрдўғаннинг бу таклифга қандай жавоб бергани ҳақидаги саволга жавобан Песков. 

Эслатиб ўтамиз, Владимир Путин “Россия энергетика ҳафталиги” форумида газ марказини яратиш ғояси билан чиқди. Унинг таъкидлашича, Болтиқ денгизи туби бўйлаб “Шимолий оқим” орқали йўқолган газ транзити Қора денгиз минтақасига ўтказилиши ва шу тариқа Туркияда Европадаги энг йирик газ хабини яратиш мумкин.