Путин билан учрашмагунимизча ҳеч нарса бўлмайди – Трамп уруш тугаши ҳақида

АҚШ Президенти Дональд Трамп Россия-Украина урушига оид тинчлик музокаралари фақат у ва Россия Президенти Владимир Путин учрашган тақдирда илгарилаши мумкинлигини таъкидлади. Бу ҳақда у бугун, 15 май куни Абу-Дабига учиб кетаётган вақтда Air Force One бортида журналистларга берган интервьюсида айтди.

“Путин билан учрашмагунимизча ҳеч нарса бўлмайди”, деди Трамп.

CNN’нинг ёзишича, Трамп Истанбул музокараларига борадиган Россия делегацияси таркибида Путиннинг йўқлигидан ҳафсаласи пир бўлмаганини айтган. У делегация таркиби ҳақида ҳеч қандай маълумотга эга эмаслигини ҳам қўшимча қилган.

Қайд этиш жоиз, айни дамда Дональд Трамп Яқин Шарқда бўлиб турибди. У олдинроқ расмий давлат ташрифи билан Бирлашган Араб Амирликларининг Абу-Даби шаҳрига етиб борди.

Эслатиб ўтамиз, бугун, 15 май куни Истанбулда Россия ва Украина ўртасидаги урушни тугатиш бўйича музокаралар ўтказилиши режалаштирилган. Музокаралар куннинг иккинчи ярмида бўлиб ўтиши кутилмоқда.

Трамп илгарироқ Туркияга боришга тайёрлигини билдирган, бироқ Владимир Путин музокараларда қатнашмаслигини билдиргач, бу режадан воз кечганини айтган. Шунга қарамай, агар зарурат туғилса, Трамп эртага, 16 май куни Туркияга боришга тайёрлигини билдирган. Кремль эса яқин кунларда Путин ва Трамп учрашуви режалаштирилмаганини маълум қилган.

Украина Президенти Владимир Зеленский эса Туркияга ташриф буюриб, Анқарада мамлакат Президенти Ражаб Тойиб Эрдўған билан учрашди.