Путин Беларусда дрон заводи қурмоқчи

Москва ва Минск Беларусь Республикасида дрон ишлаб чиқарадиган заводни биргаликда қуришга тайёр. Бу ҳақда Россия Президенти Владимир Путин кеча, 29 апрель куни беларуслик Александр Лукашенко билан Волгограддаги учрашуви чоғида маълум қилди.

“Мутахассисларингиз ва тегишли лабораториянгиз билан биргаликда заводга пойдевор қўйишга тайёрмиз”, деди Путин.

Шунингдек, Россия раҳбари Беларусь билан ўрта масофага учувчи самолётлар бўйича ҳамкорликда ишлаш истиқболларини тилга олган.

Март ойи бошида Беларусь давлат ахборот агентлиги БелТА хабар беришича, Александр Лукашенконинг Россия дронлари кўргазмасига ташрифи чоғида Россия томони Минскка Беларусда йилига 100 минг донагача қувватга эга учувчисиз самолётлар ишлаб чиқариш заводини қуришни таклиф қилган.

“Беларусда жойлашган завод тўлиқ маҳаллийлаштирилган бўлиб, барча технологик компетенциялари бу ерга олиб келинган, айни пайтда Россия ва бошқа мамлакатлардаги заводлар билан бир вақтда ягона технологик платформада ишлайди (биз фақат Россия ҳақида гапирмаяпмиз). Асосий таклиф – бир йил ичида йилига 100 минг донагача маҳсулот ишлаб чиқарадиган завод қуриш. Бу Россия томонининг таклифи”, деган Россия Федерацияси Президенти маъмурияти раҳбари ўринбосари Максим Орешкин.

Эслатиб ўтамиз, Россиянинг учувчисиз ҳаво тизимлари ишлаб чиқувчиси бўлган “Транспорт будущего” компанияси бош директори Юрий Козаренко 28 апрель куни “ИННОПРОМ. Марказий Осиё” халқаро саноат кўргазмасининг ялпи мажлисида жорий йил охиригача Ўзбекистонда фуқаролик дронлари ишлаб чиқарувчи корхонани ишга туширилишини маълум қилганди.