Путин АҚШни “дуэл”га таклиф қилди

Россия Президенти Владимир Путин Қўшма Штатларга Киевга "Орешник" ракетаси ҳужуми билан "XXI асрнинг юқори технологияли дуэли"ни ўтказишни таклиф қилди. Бу ҳақда у бугун, 19 декабрь куни “Владимир Путин билан йил натижалари” дастурида маълум қилди.

Путин Ғарб ҳаво ҳужумидан мудофаа кучларининг бундай зарбани қайтариш имконияти йўқлигини айтди. У “технологик эксперимент ўтказишни” таклиф қилди:

“Агар Ғарб мутахассислари шундай деб ўйлаётган бўлса, бизга ва Ғарбда, АҚШда уларга тўлаётганларга XXI асрнинг юқори технологияли дуэли каби технологик тажрибани ўтказишни таклиф қилишсин. Улар йўқ қилиш учун бирон бир нишонни аниқласин, айтайлик, Киевда, барча ҳаво мудофааси ва ракетага қарши мудофаа кучларини ўша ерда тўплашсин ва биз "Орешник" билан у ерга зарба берамиз. Ва келинг, нима бўлишини кўриб чиқайлик. Биз бундай тажрибага тайёрмиз. Нариги тараф тайёрми? Менимча, бу биз учун ҳам, Америка томони учун ҳам фойдали бўлади", деди у.

Бундан ташқари, Владимир Путин "Орешник" "замонавий ва жуда янги қурол" эканлигини айтди.

"Фаолиятнинг ҳар қандай соҳасида амалга ошириладиган ҳамма нарса аввалги ишланмаларга, олдинги ютуқларга асосланади ва ўшандаодамлар олдинга қадам қўяди", деди у.

Путиннинг сўзларига кўра, “Орешник”нинг парвоз масофаси 5,5 минг километргача етади ва дунёда учириш вақтида унга етадиган тизимлар йўқ. Россия Президенти Американинг ракетага қарши мудофаа тизимини қиммат ва самарасиз деб атади.

Эслатиб ўтамиз, 10 декабрь куни Пентагон ракетага қарши мудофаа агентлиги биринчи марта ўрта масофага мўлжалланган баллистик ракетани муваффақиятли синовдан ўтказганини маълум қилганди. Бу Тинч океанининг ғарбий қисмидаги Гуам ороли қирғоқларида ўтказилган синовлар вақтида юз берди.