Пригожин саратонга чалинган – ОАВ

“Вагнер” хусусий ҳарбий компанияси асосчиси Евгений Пригожин онкологик касалликка чалингани айтилмоқда. Бу ҳақдаги хабарлар оммавий ахборот воситаларида тарқалди.

Маълумотларда келтирилишича, Пригожин узоқ вақтдан буён қорин бўшлиғи саратонидан даволаниб келган ва жиддий муолажани бошидан ўтказган. Айнан шу касаллик туфайли “Вагнер” раҳбари ҳозиргача соғлом турмуш тарзини олиб боради ва қатъий диетага риоя қилади.

Шунингдек, Пригожин касаликдан даволаниш мақсадида Владимир Путиннинг қизи Мария Владимировна Воронцовага тегишлилиги айтилган “Согаз” клиникасида бўлган ва у клиниканинг имтиёзли мижозларидан бири ҳисобланган.

Маълумот ўрнида, Евгений Пригожин ҳарбий исён кўтарганидан кейин унинг уйида тинтув ўтказилиб, катта миқдордаги пуллар ва бошқа буюмлар мусодара қилинганди. Ўшанда COVID пандемияси вақтидан сақланиб қолган, тўлиқ жиҳозланган тиббиёт хонаси ҳам топилган.  У ердаги қурилмалар реанимация ва интенсив терапия бўлимларида фойдаланилади.

Аввалроқ, Америка Қўшма Штатларининг истеъфодаги генерали Роберт Абрамс “Вагнер” раҳбари Евгений Пригожин муваффақиятсиз исёндан сўнг ўлдирилган ёки қамалган бўлиши мумкинлигини айтганди.

Шунингдек, АҚШ Президенти Жо Байден Пригожинга муваффақиятсиз қўзғалондан сўнг “заҳарланишдан эҳтиёт бўлишни” маслаҳат берганди.

Пригожиннинг бир кунлик исёни

Жорий йилнинг 24 июнь куни “Вагнер” жангчилари Ростовдаги Жанубий ҳарбий округ штаб-квартирасини эгаллаб олди. Пригожин Россия Мудофаа вазири Сергей Шойгу ва Бош штаб бошлиғи Валерий Герасимов “Вагнер”га топширилишини талаб қилиб, Москвага боришини эълон қилди. Бу орада Москвада ҳам хавфсизлик чоралари кучайтирилди. Россия Федерал хавфсизлик хизмати эса Пригожинга қарши жиноий иш қўзғатди. Кечга бориб Беларусь фуқароси Александр Лукашенко Россия Федерацияси Президенти билан келишилган ҳолда “Вагнер” раҳбари Евгений Пригожин билан музокара олиб боргани маълум бўлди. Музокаралар якунида Россия ҳудудида қуролли ҳаракатларни тўхтатиш ва кескинликни юмшатиш тўғрисида қарор қабул қилинди. Пригожин ҳам Москвага кетаётган қўшинлари ортга қайтарилганини маълум қилди.