Президентни ҳақорат қилган ўзбекистонлик Озарбайжонда қўлга тушди

Ўзбекистон Президенти Шавкат Мирзиёевнинг шаъни ва қадр-қимматини камситиш билан боғлиқ жиноятни содир этганликда айбланаётган ўзбекистонлик Омонбек Юсупов Бакудан Тошкентга экстрадиция қилинди. Бу ҳақда Озарбайжон Бош прокуратураси хабар берди.

43 ёшли Юсупов давлатлараро қидирувга берилиб, жорий йилнинг апрель ойида Озарбайжонда ҳибсга олинган эди. Унга нисбатан қамоққа олиш тарзидаги эҳтиёт чораси танланганди.

“Фуқаролик, оила ва жиноят ишлари бўйича ҳуқуқий ёрдам ва ҳуқуқий муносабатлар тўғрисида” 2002 йил 7 октябрдаги Конвенцияга асосан, айбланувчининг экстрадицияси (ватанга топширилиши) ҳақида қарор қабул қилиниб, у Ўзбекистоннинг ваколатли органларига Озарбайжон Адлия вазирлиги Пенитенциар хизматининг махсус конвойи кузатувида топширилган.

Эслатиб ўтамиз, аввалроқ 25 ёшли Ўзбекистон Республикаси фуқаросининг жиноий жавобгарликка тортилиши учун экстрадиция қилиниши юзасидан Ўзбекистон Бош прокуратурасининг сўрови қаноатлантирилганди.