Президент Фарғонада ёш футболчилар билан мулоқот қилди

Бугун, 28 апрель куни Президент Шавкат Мирзиёев Фарғона вилояти футбол ассоциациясига қарашли футбол маркази ва “Нефтчи” болалар футбол академиясида яратилган шароитлар билан танишди. Бу ҳақда Президент матбуот хизмати хабар берди. 

Фарғона вилояти ўзининг бой футбол анъаналари ва истеъдодли чарм тўп усталари билан машҳур. Жумладан, 1962 йилда ташкил этилган “Нефтчи” футбол клуби Ўзбекистон Суперлигасининг 6 карра чемпиони, мамлакат кубогининг 2 карра ва суперкубокнинг 1 карра соҳиби ҳисобланади. Шунингдек, клуб 1994 йилда МДҲ кубоги финалчиси бўлган, 1994-1995 йилларда эса Осиё чемпионлар лигасида бронза медалларини қўлга киритган.

Бугун ҳам ҳудудда иқтидорли ёш футболчиларни саралаб олиш ва тайёрлаш, малакали мураббийлар захирасини шакллантириш бўйича тизимли ишлар олиб борилмоқда.

Хусусан, профессионал футбол клублари академияларини ривожлантиришга қаратилган чоралар натижасида 2025 йилда “Нефтчи” болалар футбол академияси ташкил этилган.

4,5 гектардан ортиқ майдонни эгаллаган академия 150 нафардан зиёд ўқувчи-ёшлар учун мўлжалланган. Бу ерда 6 та катта ва кичик футбол майдони, замонавий тиббий ва реабилитация ускуналари билан жиҳозланган физиотерапия бўлими фаолият юритади.

Академияда 1,1 миллион долларлик сунъий қопламали, ҳаво гумбаз билан ёпилган ёпиқ футбол манежи барпо этилган.

Вилоятда футбол муҳитини жаҳон стандартлари даражасига олиб чиқиш, иқтидорли ёшларни саралаш мақсадида UEFA инструкторлари ва бошқа халқаро мутахассислар жалб қилинган.

Президент академияда футболчилар учун яратилган шароитларни кўздан кечирган. Ёшлар билан мулоқот қилиб, уларнинг машғулотларини кузатган.

Эслатиб ўтамиз, аввалроқ Шавкат Мирзиёев Фарғона шаҳридаги IT-парк мажмуасида яратилган шарт-шароитлар билан танишганди.