Prezident 15 ta tuman IIB boshlig‘i hamda 5 ta tuman prokurorini ishdan oldi

Prezident Shavkat Mirziyoyev O‘zbekistondagi 15 ta tuman Ichki ishlar boshqarmasi boshlig‘i va 5 nafar tuman prokurorini vazifasidan ozod qildi. Bu haqda davlat rahbarining matbuot kotibi Sherzod Asadov ma’lum qildi.

Qayd etilishicha, Prezident Farg‘ona shahrida o‘tkazilgan Ichki ishlar vazirligining kengaytirilgan hay’at yig‘ilishida jinoyatchilikka qarshi kurashishda sustkashlikka yo‘l qo‘ygani uchun Sergeli, Yangihayot, Shayxontohur, G‘ijduvon, Kogon, Tuproqqal’a, Taxtako‘pir, Tomdi, Yakkabog‘, Oltinsoy, Zafarobod, Boyovut, Guliston, Mingbuloq, Oltinko‘l tumanlari ichki ishlar boshliqlari hamda Andijon, Bandixon, Buvayda, Narpay, Yunusobod tumanlari prokurorlarini egallab turgan lavozimidan ozod qilgan.

Shuningdek, jinoyatchilikni jilovlash va aholi bilan ishlashda sustkashlikka yo‘l qo‘yganligi uchun Bosh prokurorning birinchi o‘rinbosari B.Valiyev, ichki ishlar vazirining birinchi o‘rinbosari Sh.Rahmonovga, mahallada profilaktika inspektorlari ishini lozim darajada tashkil qilmagani uchun, ichki ishlar vazirining ushbu sohaga mas’ul o‘rinbosari B.Abdullayevga hayfsan e’lon qilingan va uch oy sinov muddati tayinlangan.

Barcha viloyat prokurorlari va IIB boshliqlarining birinchi o‘rinbosarlari o‘ziga tegishli xulosa qilmasa, yil yakuni bilan hammasi lavozimidan ozod etilishi haqida ogohlantirilgan.

Eslatib o‘tamiz, kecha Farg‘ona viloyati IIB boshlig‘i lavozimidan ozod qilinib, o‘rniga yangi rahbar tayinlangandi. Bugun esa Ichki ishlar vazirining o‘rinbosari Najmiddin To‘raxo‘jayev vazifasidan olindi.