Португалияда Роналду ҳайкали ёқиб юборилди (видео)

Португалиянинг Мадейра оролида жойлашган CR7 музейи олдида номаълум шахс Криштиану Роналду ҳайкалини ёқиб юборди. Ушбу шахс воқеани видеога олиб, уни ижтимоий тармоқларда эълон қилди. Бу ҳақда UOL нашри хабар берди.

Маълумотларга кўра, эркак видеони ўзининг Instagram саҳифасидаги тармоғига жойлаштириб, изоҳда  “Бу Худонинг охирги огоҳлантириши”, дея ёзган ва Криштиану Роналдунинг расмий аккаунтини белгилаган.

Видеода йигит Роналду ҳайкалига ёнувчан суюқлик сепиб, уни ёқиб юбораётгани акс этган. Шундан сўнг у мусиқа қўйиб, рақс тушишни бошлаган. Бироқ ёнғин тез орада ўчиб кетган ва ҳайкалга жиддий зарар етмагани айтилмоқда.

Мазкур ҳайкал португалиялик футболчининг туғилган жойи ҳисобланган Мадейра оролининг Фуншал шаҳрида, сайёҳлар кўп ташриф буюрадиган CR7 музейи олдида жойлашган. Музейда Роналду фаолияти давомида эришган ютуқлари, портретлари ва шахсий буюмлари намойиш этилади. 

Португалиянинг “Correio da Manhа” нашри хабарига кўра, Мадейра ороли Жамоат хавфсизлиги полицияси (PSP) ҳодисани содир этган шахсни аллақачон аниқлаган. Маълум бўлишича, у аввал ҳам шунга ўхшаш ҳодисалар билан танилган.