Польшалик эркак тарихда илк бор Болтиқ денгизини сузиб ўтди (видео)

Польшалик спортчи Бартломей Кубковский сувдан чиқмасдан ва ҳамроҳлик қилувчи кемага тегмасдан Швециядан Польшагача Болтиқ денгизини сузиб ўтишга муваффақ бўлган тарихдаги биринчи инсон бўлди. Бу ҳақда “Deutsche Welle” хабар берди.

Қайд этилишича, 31 ёшли сузувчи тахминан 160 километрлик масофани 55 соатда босиб ўтган. Кубковский учун ушбу уриниш бешинчиси бўлган.

Спортчи жорий йилнинг 31 июль куни Швециянинг Касеберга қишлоғидан йўлга чиқиб, 2 август куни кечқурун Польшанинг Дзивнув шаҳри қирғоқларига етиб келган. Икки суткадан ортиқ вақт давомида кучли тўлқинлар, шамол ва паст ҳароратга қарамай, у узлуксиз сувда бўлган.

Сузиш давомида унга овқат ва ичимликлар рекорд шартларини бузадиган жисмоний алоқага йўл қўймаслик учун ҳамроҳлик қилувчи қайиқдан узатиб турилди.

Спортчи жамоасининг маълумотларига кўра, иккинчи кечада кучли толиқиш сабабли Кубковскийда галлюцинация пайдо бўлган. Шунга қарамай, у сузишни якунлай олган ва уни қирғоқда кўплаб мухлислар кутиб олган.

Маълумот учун, аввалги рекорд бошқа польшалик сузувчи Себастьян Карасьга тегишли эди. У 28 соат ичида Польшадан Даниягача бўлган 100 км масофани сузиб ўтган.

Эслатиб ўтамиз, аввалроқ дунёнинг энг машҳур альпинистларидан бири, дунёдаги энг баланд 14 та тоғни забт этиш бўйича рекорди билан кўпчиликка танилган Нирмал Пуржа қор кўчкиси оқибатида ҳалок бўлганди. Ҳодиса Покистондаги баландлиги 8047 метр бўлган Броуд-Пик чўққисида (бу дунёдаги 12-энг баланд чўққи) содир бўлган.