Платини Инфантинони судга берди

Европа футбол иттифоқи (UEFA)нинг собиқ президенти Мишель Платини FIFA президенти Жанни Инфантинога қарши жиноий шикоят аризаси билан мурожаат қилди. Бу ҳақда “L’Equipe” нашри хабар берди.

Манбага кўра, FIFA’нинг собиқ юридик директори Марко Виллигер ҳамда ташкилотнинг аудит ва мувофиқлик қўмитасининг собиқ раиси Доменико Скала устидан ҳам шикоят берилган.

Платинининг таъкидлашича, улар “унинг 2016 йилда FIFA президенти этиб сайланишига тўсқинлик қилиш учун ҳаракат қилган”.

Жиноий шикоятдан ташқари, 70 ёшли функционер Марсель судида FIFA’дан товон пули ундиришни талаб қилиб, фуқаролик даъвосини ҳам киритган. Иш Платинининг президентлик фаолияти давомида олган маошлари билан боғлиқ.

Бунгача Платини Инфантинога қарши икки марта шикоят киритган. Бироқ улар Швейцария суди томонидан даъво муддати тугагани сабабли рад этилган ёки иш юритуви тўхтатилган.

Маълумот учун, Мишель Платини 2007-2015 йилларда UEFA президенти лавозимида фаолият юритган. У FIFA’даги коррупцияга оид терговлар ортидан ўз лавозимидан четлатилган. 2015 йил декабрь ойида FIFA Ахлоқ қўмитасининг суд палатаси уни 8 йил муддатга футбол фаолиятидан четлатиш ҳақида қарор чиқарган. Кейинчалик, мазкур жазо муддати 4 йилга қисқартирилган.

2023 йил январь ойида Беллинцона суди Платинини фирибгарлик айбловлари бўйича оқлаган. Швейцария ва Франция фуқароларига қарши фирибгарлик, ишончни суиистеъмол қилиш, қонунбузарлик ҳамда ҳужжатларни қалбакилаштириш бўйича суд жараёни 2022 йил июль ойида якунланган эди.

2025 йил март ойида эса, Швейцария Федерал жиноят судининг Апелляция палатаси прокуратуранинг Платинини фирибгарлик айбловлари бўйича оқлаш қарори бўйича берган шикоятини рад этди.