Пикассонинг сирли тарзда ғойиб бўлган асари топилди

Аввалроқ, Пабло Пикассонинг “Гитарали натюрморт” номли 1919 йилда яратилган асари Испания пойтахти Мадриддан Гранадага олиб кетилаётганда сирли тарзда ғойиб бўлгани ҳақида хабар берилганди. Ушбу асарнинг Гранадага йўл олмагани ва ҳатто транспортга юкалнгмагани маълум бўлди. Бу ҳақда “El Pais” хабар берди.

Қайд этилишича, гуашда ишланган 1919 йилги асар тахминан 600 000 еврога суғурталанган. У ўтган ҳафта Гранадада очилган CajaGranada жамғармасининг “Nature morte. La eternidad de lo inerte” (“Натюрморт. Ҳаракатсизликнинг абадийлиги”) кўргазмасида намойиш этилиши режалаштирилган. Асар 56 та бошқа асар билан бирга қадоқланиб, жорий йилнинг 25 сентабрда жўнатишга тайёрланган.

CajaGranada жамғармасига кўра, жорий йилнинг 3 октябрь куни транспорт компанияси юкни видеокузатув остида етказиб берган. Бироқ ўрамларнинг тўлиқ рақамлари бўлмагани сабабли ходимлар уни очиб текширмагунча батафсил назоратни амалга оширолмаган. Қабул ҳужжатлари кейинчалик солиштириш шарти билан имзоланган.

Жорий йилнинг 6 октябрь куни ўтказилган текширув натижасида суратларнинг бири йўқлиги аниқланган. Шундан сўнг, ташкилот полицияга мурожаат қилган. Асарнинг йўқолиши Интерполнинг ўғирланган ва бедарак йўқолган санъат асарлари бўйича халқаро базасига киритилган.

Маълум бўлишича, ижод наъмунаси ҳатто пойтахтни тарк этмаган ва у Гранадага етказиш учун мўлжалланган транспорт воситасига юкланмай қолиб кетган. Ҳуқуқ-тартибот идораларига кўра, Тарихий мерос бўлими терговни давом эттирмоқда.

Асарни намойиш этиш учун масъул бўлган CajaGranada жамғармаси “El País” нашрига берган изоҳида улар суд жараёнида иштирок этаётган томон бўлгани сабабли ҳозирча ҳеч қандай баёнот бермасликни афзал кўришини билдирган. Шу билан бирга, улар бошқа барча асарлар кўргазмада жойида эканини ва тергов якунлангач, Пикассонинг асарини ҳам кўргазмага қўшиш истагини билдирган.

Эслатиб ўтамиз, аввалроқ Пикассонинг 80 йилдан бери кўрилмаган сурати кимошди савдосига қўйилиши ҳақида хабар берилганди. “Гулли қалпоқли аёл бюсти” картинаси Парижда чизилган бўлиб, машҳур рассомнинг ўша пайтдаги севгилиси Дора Маарнинг портрети ҳисобланади.

Моҳичеҳра Қадамова