Пикакс тоғини йўқ қиламиз. Эрон тайёр турсин – Трамп

АҚШ Президенти Дональд Трамп яқин орада АҚШ Эрондаги Пикакс тоғига зарба беришини маълум қилиб, Вашингтон Эронга қарши кучли ҳужумларни давом эттириши ҳақида огоҳлантирди. Бу ҳақда “Reuters” хабар берди.

Трампнинг айтишича, АҚШ ушбу объектни доимий кузатиб бормоқда ва Эроннинг ядро дастурига оид ҳар қандай фаолиятга кескин жавоб қайтаришда давом этади.

“Биз Пикакс тоғини йўқ қиламиз. Эронликларга тайёр туришларини айтинг”, деган Трамп Hugh Hewitt Show дастурига берган интервьюсида.

Манбанинг ёзишича, Пикакс тоғи Эроннинг жиддий зарар кўрган Натанз уранни бойитиш иншооти яқинида жойлашган. Тоғ ичида иккита чуқур ерости туннель мажмуаси мавжуд. Мутахассислар ушбу объект АҚШ ихтиёридаги энг кучли бункерга қарши бомбалар зарбасига ҳам бардош бера олишини айтмоқда.

“Биз у ерни диққат билан кузатяпмиз. Ҳар сафар у ерда бирор фаолият ҳақида эшитсак, уни портлатамиз. Шунинг учун улар бу ҳақда гапиришни ёқтиришмайди. Улар ядровий вазият билан яхши ишламаяпти. Лекин биз, эҳтимол, яқин орада Пикаксга ҳам зарба берамиз”, деган Трамп.

У, шунингдек, АҚШ Форс кўрфазида Эрон кемаларига нисбатан блокадани қайта тиклагани ва Ҳормуз бўғози очиқ қолишини таъминлашини ҳам билдирган.

“Биз уларга бугун кечаси ҳам, эртага ҳам жуда қаттиқ зарба берамиз. Ва улар бунга қарши ҳеч нарса қила олмайди”, деган АҚШ Президенти.

Эслатиб ўтамиз, жорий йилнинг 12 июль куни тунда АҚШ ҳарбийлари Ҳормуз бўғозидаги кескинлик кучайиши ортидан Эронга қарши янги ҳужумлар бошлаган эди.