Пезешкиён Трамп таҳдидига қарамай АҚШ билан музокара олиб бормоқчи

АҚШ Президенти Дональд Трампнинг куч ишлатиш таҳдидига қарамай, Теҳрон Вашингтон билан музокараларни давом эттиради, аммо тинч ядровий энергияни ривожлантириш ҳуқуқидан ҳеч қачон воз кечмайди. Бу ҳақда бугун, 17 май куни Эрон Президенти Масъуд Пезешкиён мамлакат ҳарбий-денгиз кучлари раҳбарияти билан учрашувда маълум қилди.

“Бир томондан Трамп минтақада тинчлик ҳақида гапиради. Бошқа томондан, у бизга таҳдид қилиб, мисли кўрилмаган зўравонлик воситаларига эга эканини даъво қилмоқда. Унинг қайси сўзларига ишонишимиз керак? Тинчлик ҳақидаги сўзларгами ёки одамларни ўлдириш ва йўқ қилиш ҳақидаги сўзларгами? Биз урушга интилмаймиз, лекин таҳдидлардан ҳеч қачон қўрқмаймиз. Биз музокаралар олиб борамиз, лекин ҳарбий, илмий ва ядровий соҳалардаги ютуқларимиздан ҳеч қачон воз кечмаймиз.

Трамп аввалроқ Эронга ядровий технология керак эмас, чунки у аллақачон нефтга бой, деган фикрни билдирган эди. Америка етакчиси республика ядро қуролига эга бўлишининг олдини олиш учун Эронга қарши “ҳалокатли зарба” беришга тайёрлигини таъкидлаб, муаммони дипломатик йўл билан ҳал қилишни афзал кўришини таъкидлаган эди.

АҚШ ва Эрон Уммон воситачи сифатида Теҳрон ядровий дастури бўйича келишмовчиликларни бартараф этиш учун тўрт раунд музокара ўтказди. Улардан биринчиси 12 апрель куни Уммон пойтахти Маскатда, иккинчиси 19 апрель куни Римда, учинчи ва тўртинчиси 26 апрель ва яна 11 май куни Уммон пойтахтида бўлиб ўтди. Маслаҳатлашувларда Эрон делегациясига Ташқи ишлар вазири Аббос Ароқчи, Америка делегациясига эса Президентнинг махсус вакили Стивен Уиткофф бошчилик қилди.