Пезешкиён Эрондаги намойишларда Трамп, Нетаньяху ва Европанинг қўли борлигини айтди

Эрон Президенти Масъуд Пезешкиён АҚШ, Исроил ва Европа етакчиларини мамлакатдаги иқтисодий муаммолардан фойдаланиб, норозилик намойишларини қўзғатишда айблади. Унинг сўзларига кўра, ташқи кучлар Эрон жамиятини парчалаш мақсадида намойишчиларга турли воситалар тақдим этган. Бу ҳақда бугун, 31 январь куни Президент телевидение орқали чиқишида маълум қилди. 

Қайд этилишича, жонли эфирда чиқиш қилган Пезешкиённинг айтишича, АҚШ, Исроил ва Европа етакчилари бегуноҳ одамларни бу ҳаракатларга жалб қилиш, жамиятда бўлиниш ва низо уйғотиш ҳамда норозиликларни моддий ва ташкилий жиҳатдан қўллаб-қувватлашга уринган.

“Трамп, Исроил Бош вазири Беньямин Нетаньяху ва европаликлар бизнинг муаммоларимиздан фойдаланиб, жамиятни парчалашга ҳаракат қилишди ва ҳозир ҳам шуни давом эттирмоқда. Улар одамларни кўчаларга олиб чиқиб, мамлакатни ичидан парчалашни, низо ва нафрат уйғотишни исташди. Бу оддий ижтимоий норозилик эмас эди”, деди Эрон Президенти.

АҚШ Президенти Дональд Трамп эса намойишчиларни бир неча бор очиқ қўллаб-қувватлаб, агар Эрон расмийлари норозиларни ўлдиришда давом этса, Вашингтон чоралар кўришга тайёр эканини билдирган. АҚШ расмийлари Трамп турли вариантларни кўриб чиқаётганини, бироқ Эронга зарба бериш бўйича якуний қарор қабул қилинмаганини маълум қилган.

Шу билан бирга, Исроилнинг “Ynet” нашри АҚШ Ҳарбий-денгиз кучларига қарашли эсминец Исроилнинг Эйлат портига келиб тўхтаганини хабар қилган.

2025 йил декабрь ойи охирида инфляция даражасининг ошиши ва яшаш нархларининг қимматлашуви ортидан бошланган икки ҳафталик умумхалқ норозилик намойишлари мамлакат бўйлаб тарқалган. Ушбу тартибсизликлар чоғида камида 6563 киши, жумладан, 6170 нафар намойишчи ва 214 нафар хавфсизлик ходими ҳалок бўлган. Норозиликлар куч билан бостирилгач, намойишлар тўхтаган.

Эрон Ташқи ишлар вазири Аббос Ароқчи эса CNN телеканалида берган интервьюсида қурбонлар сони бўйича бошқа рақамларни келтириб, 3100 киши, жумладан, 2000 нафар хавфсизлик ходими ҳалок бўлганини билдирган.

Маълум бўлишича, Туркия, Бирлашган Араб Амирликлари ва Саудия Арабистони каби минтақавий давлатлар Вашингтон ва Теҳрон ўртасида эҳтимолий ҳарбий тўқнашувнинг олдини олиш мақсадида дипломатик саъй-ҳаракатларни кучайтирмоқда.

АҚШ музокараларни қайта бошлаш шарти сифатида Эрондан ракета дастурини чеклашни талаб қилмоқда. Бироқ, Эрон бу талабни қатъиян рад этмоқда. Ташқи ишлар вазири Ароқчи 27 январь куни Туркияда берган баёнотида ракета масаласи ҳеч қачон музокара мавзуси бўлмаслигини таъкидлади. АҚШнинг ҳарбий таҳдидларига жавобан Ароқчи Теҳрон музокараларга ҳам, эҳтимолий урушга ҳам тайёр эканини, шунингдек, минтақада барқарорлик ва тинчликни таъминлаш учун қўшни давлатлар билан ҳамкорлик қилишга тайёрлигини билдирди.

“Режим ўзгариши – бу хомхаёл. Айримлар ана шу иллюзияга ишониб қолган. Бизнинг тизимимиз шу қадар чуқур илдиз отганки, айрим шахсларнинг келиши ёки кетиши ҳеч нарсани ўзгартирмайди”, деган Ароқчи.

Эслатиб ўтамиз, аввалроқ Пезешкиён АҚШ музокараларни давом эттириш учун “камситувчи шартлар” қўяётганини ва Эрон бундай шартларни қабул қилмаслигини маълум қилгани ҳақида хабар берилганди. Унинг таъкидлашича, Эрон на таҳқирга, на заифликка йўл қўймайди.