Перес “Барселона” юлдузини “Реал”га олиб келмоқчи

“Реал Мадрид” президенти Флорентино Перес 2000 йилда Луиш Фигу “Барселона”дан Мадрид клубига ўтган шов-шувли трансферга ўхшаш сценарийни яна такрорлашни истамоқда. Бу сафар “қироллик клуби” “Барселона” ярим ҳимоячиси Педрини ўз жамоасига олиб келиш ниятида. Бу ҳақда “El Desmarque” нашри хабар берди.

Манбага кўра, мадридликлар 23 ёшли футболчини ўз сафига қўшиб олиш имкониятларини ўрганмоқда. Перес учун бу трансфер нафақат жамоани кучайтириш, балки принципиал рақибдан етакчи ўйинчини олиб кетиш нуқтаи назаридан ҳам муҳим ҳисобланади.

Бироқ инсайдерлар бу битим амалга ошиши деярли имконсиз эканини таъкидламоқда. Педрининг “Барселона” билан амалдаги шартномаси 2030 йилгача мўлжалланган бўлиб, ундаги товон пули 1 миллиард еврони ташкил қилади. Футболчи ўзини Каталония клуби лойиҳасининг ажралмас қисми деб билади ва жамоага содиқлигини бир неча бор таъкидлаган.

Маълумот учун, Педри 2019 йилдан буён “Барселона” шарафини ҳимоя қилиб келади. Шу вақт ичида у барча мусобақаларда 227 та ўйинда майдонга тушиб, 28 та гол урди ва 29 та голли узатма муаллифига айланди. “Transfermarkt” портали унинг бозор қийматини ҳозирда 140 миллион еврога баҳоламоқда.