Пашинян Макронга Алиев билан фавқулодда музокара ўтказишга тайёрлигини айтди

Арманистон Бош вазири Никол Пашинян Франция Президенти Эммануэль Макрон билан телефон суҳбатида Арманистон ва Озарбайжон чегарасида кучайиб бораётган кескинликни муҳокама қилди. Бу ҳақда бугун, 9 сентябрь куни Елисей саройига таяниб, AFP хабар берди.

“Суҳбат Озарбайжон томонидан Арманистон билан чегарада ва Қорабоғ яқинида ҳарбий ресурслар тўплангани ҳақидаги хавотирли хабарлар контекстида бўлди. Макрон Қорабоғдаги гуманитар инқирозни ҳал қилиш ҳамда можарони халқаро ҳуқуқ нормаларига мувофиқ ва фақат дипломатик йўллар билан адолатли ва доимийга ҳал этиш тарафдори эканини билдирди”, дейилади Елисей саройи баёнотида.

Пашинян эса чегарадаги вазиятни юмшатиш бўйича Озарбайжон Президенти Илҳом Алиев билан зудлик билан музокаралар ўтказишга тайёр эканини айтган.

Эслатиб ўтамиз, олдинроқ Бош вазир Никол Пашинян Озарбайжон Арманистон билан чегарада қўшинлар тўплаганини даъво қилганди. Баку эса унинг баёнотларини рад этиб, Арманистон Озарбайжон билан чегарада ишчи кучи ва ҳарбий техникани жамлаётганини эълон қилди. Озарбайжон Ташқи ишлар вазирлигига кўра, Арманистон “очиқдан-очиқ янги хандаклар қазиб, истеҳкомлар қурмоқда”. Қорабоғ атрофида вазият кескинлашгани ҳақидаги баёнотлар фонида Ереван АҚШ билан қўшма машғулотлар ўтказишини эълон қилди.