Париж-2024 Олимпия ўйинларининг очилиш маросими дарё бўйида ўтказилади

Франциянинг Париж шаҳрида 2024 йил ёзида бўлиб ўтадиган ХХХIII ёзги Олимпия ўйинларининг очилиш маросими Ўйинлар тарихида илк бор стадионда ўтказилмайди. Бу ҳақда Ўзбекистон Миллий олимпия қўмитаси ахборот хизмати хабар берди.

Манбага кўра, 17-18 июль кунлари Франция пойтахтида бўлажак Олимпия ўйинларининг тайёргарлигига бағишланган семинар бўлиб ўтган. Мусобақа ташкилий қўмитаси томонидан ўтказилаётган мазкур тадбирда бутун дунёдаги Олимпия қўмиталаридан делегатлар иштирок этган. Унда Ўзбекистон номидан қўмита бош котиби Ойбек Қосимов ҳамда Халқаро алоқалар департаменти мутахассислари қатнашган.

Семинар аввалида Париж-2024 ҳақидаги умумий маълумотлар жамланган тақдимот ўтказилган. Унда бир қатор қизиқарли жиҳатларни учратиш мумкин. Жумладан, кўпчиликнинг эътиборини тортган ҳолат мусобақа очилиш маросими бўлди. Маълум қилинишича, ХХХIII ёзги Олимпия ўйинларининг очилиш маросими ўйинлар тарихида илк бор стадионда эмас, дарё бўйлаб ўтказилади. Сена дарёси қабул қиладиган ушбу тарихий воқелик 2024 йилнинг 26 июль кунига белгиланган.

Тадбир ташкилотчиларининг билдиришича, бу орқали маросимни жонли томоша қилишни истаган мухлислар сонини кўпайтириш мумкин. Режага кўра, очилиш маросимини камида 500 мингдан ортиқ томошабин дарё бўйида кузатиш имкониятига эга бўлади.

Семинар давомида маросимнинг биринчи репетицияси ҳам ўтказилган. Унда синов тариқасида 39 та кема дарёда соатига 9 километр тезликда белгиланган йўналиш бўйлаб ҳаракатланган.

Анжуман доирасида Олимпия ўйинларида қатнашадиган делегациялар учун қўйиладиган талаблар бўйича ҳам маълумот берилган. Унга кўра, эндиликда ташриф буюрадиган меҳмонлар учун илк бор виза тизими жорий этилади. Қайд этиш жоизки, бунгача барча Олимпия ўйинларида иштирокчиларнинг аккредитацияси бир вақтнинг ўзида виза вазифасини ҳам бажарган. 

Шунингдек, тадбир давомида Ойбек Қосимов томонидан ташкилий қўмитага мамлакат рамзлари - Ўзбекистон Республикаси давлат байроғи ва мадҳияси намойиш этилди.