Озарбайжон ҳар дақиқа урушга тайёр туриши керак – Илҳом Алиев

north_east

Мирзиёев Алиевни тарихий воқеа билан қутлади

Озарбайжон Қуролли кучлари давлати манфаатлари ва хавфсизлигини ҳар дақиқа, ҳар куни қўриқлаб, таҳдидларнинг эҳтимолий манбаларини кузатиб, кўриб турибди. Бу ҳақда Озарбайжон Президенти Илҳом Алиев кеча, 21 август куни Келбажар туманига ташрифи чоғида маҳаллий аҳоли билан учрашувда айтиб ўтди.

“Биз ҳарбий қудратимизни оширмоқдамиз. Иккинчи Қорабоғ урушидан кейин ҳам Каспий денгизида, ҳам бошқа барча Қуролли Кучларда қўшинларимиз ривожланиши муносабати билан биз махсус кучларимиз сонини минглаб жангчиларга кўпайтирдик. Аниқ рақам айтмоқчи эмасман, лекин жуда кўп, янги қўмондонлик кучлари яратилди”, дея давом этди Алиев.

У Озарбайжонга энг замонавий учувчисиз учиш аппаратлари, янги артиллерия тизимлари етказиб берилганини қайд этди. Янги жанговар самолётлар харид қилиш бўйича шартномалар имзоланиб, мавжудлари тўлиқ модернизация қилинди.

“Биз ҳар қандай дақиқада урушга тайёр бўлишимиз керак, чунки дунёда воқеалар ривожи шундай кечмоқдаки, эртага нима бўлишини олдиндан айтиб бўлмайди, хавфсизлигимизнинг кафолати ўзимиз, давлатимиз, халқимиз ва Қуролли Кучларимиздир.

Шу боис, кимнингдир хаста бошига Озарбайжонга қарши қандайдир провокация қилиш ғояси тушса, ўйлайманки, яна пушаймон бўлади. Бундан буён биз ғолиб халқ ва ғолиб давлат бўлиб яшаймиз”, дея таъкидлади Президент.

Президентнинг сўзларига кўра, Арманистон билан тинчлик шартномаси муаллифлари расмий Бакудир.

“Ушбу нуқталарни ишлаб чиқишда бизнинг позициямиз доимо асос бўлиб келган. Ушбу ҳужжатнинг парафланиши аслида Арманистон-Озарбайжон қарама-қаршилигига чек қўйди. Шу билан бирга, тарихий минтақамиз – Нахчивон билан қуруқлик алоқаси таъминланди. Биз 2020 йилнинг ноябрь ойидан сўнгги кунларгача бу масалани астойдил кун тартибида ушлаб турдик, бу мақсадни турли йўллар билан амалга ошириш учун бор куч-ғайратимизни сарфладик ва ниҳоят унга эришдик. Арманистон аллақачон бу мажбуриятни ўз зиммасига олган ва умид қиламанки, яқин йилларда биз Озарбайжоннинг асосий қисмидан Нахчиванга поезд ва автомобилда бора оламиз”, деди Алиев.

Озарбайжон Президенти амалга оширилаётган логистика лойиҳаларининг аҳамиятига эътибор қаратиб, уларнинг нафақат мамлакат, балки бутун минтақа учун аҳамиятини таъкидлади.

“Айни вақтда бу йўналиш нафақат Озарбайжоннинг икки қисмини боғлайди. У халқаро транспорт йўлагига ҳам айланади. Ҳозирда Озарбайжон ҳудудидан бир нечта транспорт йўлаклари ўтади ва бу, албатта, мамлакатимизнинг аҳамиятини оширади. Бу йўналишда битта йўлак кетади. Зангилонгача бўлган темирйўл қурилиши муваффақиятли давом этмоқда ва келгуси йилда қуриб битказилади. Энди биз Нахчивон Мухтор Республикасида темирйўлни тўлиқ модернизация қиляпмиз. Арманистон ҳудудида ҳам темирйўл қурилиши режалаштирилган. Яъни, Арманистон ҳам бу мажбуриятни ўз зиммасига олди, бу бизнинг навбатдаги тарихий муваффақиятимиздир”, деди Илҳом Алиев.

Эслатиб ўтамиз, Озарбайжон ва Арманистон 8 август куни АҚШ воситачилигида АҚШ Президенти Дональд Трамп билан учрашув чоғида кўп йиллик можаролардан сўнг икки томонлама иқтисодий алоқаларни ривожлантирувчи ва уларни ўзаро муносабатларни тўлиқ нормаллаштиришга олиб келадиган тинчлик битимини имзолаганди. Трампнинг айтишича, икки давлат урушни тўхтатиш, дипломатик муносабатларни очиш ва бир-бирининг ҳудудий яхлитлигини ҳурмат қилиш мажбуриятини олган.