ОТБ Ўзбекистонга 125 миллион доллар қарз беради 

Осиё тараққиёт банки Ўзбекистоннинг электр узатиш тармоғини яхшилаш, энергия самарадорлигини ошириш ва қайта тикланадиган энергияни мамлакатнинг энергия мажмуасига интеграциялашувига ёрдам бериш учун 125 миллион доллар миқдорида кредит ажратишни маъқуллади. Бу ҳақда банк сайтида келтирилган.

Маълум қилинишича, “Декарбонлаштириш учун рақамлаштириш – электр узатиш тармоқларини яхшилаш” лойиҳаси доирасида етти вилоят – Бухоро, Фарғона, Қашқадарё, Самарқанд, Сурхондарё, Навоий ва Тошкентда умумий узунлиги қарийб 359 километр бўлган 12 та электр узатиш линиялари қайта тикланади. 

Шунингдек, лойиҳа Файзобод, Оби-Ҳаёт, Зафар ва Зарафшондаги 220 киловолтли тўртта кичик станцияларни реконструкция қилиш ва модернизация қилиш, уларнинг қувватларини жорий ва прогноз қилинаётган энергияга бўлган эҳтиёжни қондириш учун молиялаштиради.

“Ушбу лойиҳа Ўзбекистоннинг ишончли ва арзон электр энергиясига ортиб бораётган талабини қондиришга ёрдам беради, шу билан бирга мамлакатнинг яшил ва паст углеродли иқтисодиётга ўтишини қўллаб-қувватлайди”, дейди ОТБ Марказий ва Ғарбий Осиё бўйича Бош директори Евгений Жуков.

Лойиҳа эски технологияни назорат қилиш ва маълумотларни йиғиш тизимига улашга тайёр бўлган замонавий юқори вольтли линиялар ва нимстанцияларга алмаштириш орқали электр узатиш тармоғини рақамлаштиради. Бу операцион диспетчерлик марказига масофадан бошқаришни қўлга киритиш ва реал вақтда ва тарихий маълумотларни олиш имконини беради.

“Шунингдек, лойиҳа Ўзбекистоннинг корпоратив бошқарув миллий тармоғи ва лойиҳаларни бошқариш салоҳиятини мустаҳкамлайди. У стратегик режалар ва гендерга мос сиёсатларни яратиш, шунингдек, ҳимоя чоралари ва молиявий бошқарув бўйича салоҳиятни оширишга ёрдам беради”, дейилади банк хабарида.

Ўзбекистон Осиё тараққиёт банкига 1995 йилда аъзо бўлган. Ўшандан бери банк мамлакатга 10,8 миллиард доллар миқдорида кредитлар, грантлар ва техник ёрдам ажратган.