Отаменди терма жамоадаги фаолиятини якунлади

Аргентина терма жамоаси ҳимоячиси Николас Отаменди терма жамоадаги фаолиятини якунлади. Бу ҳақда у ўзининг Instagram саҳифаси орқали маълум қилди.

“Мен доимо ҳеч қачон ишончини йўқотмаган, сўнгги сониягача курашган ва ўз байроғи ҳамда рангларини бутун қалби билан ҳимоя қилган ажойиб жамоанинг бир қисми бўлганимдан фахрланаман”, дейди Отаменди.

Маълумот учун, 38 ёшли ҳимоячи Аргентина терма жамоаси сафидаги дебютини 2009 йилда ўтказган. У миллий жамоа билан бирга жаҳон чемпионлигини қўлга киритди, икки марта Америка кубогида ғолиб чиқди ҳамда яна бир бор Жаҳон чемпионати финалигача етиб борди.

Николас Отаменди Аргентина терма жамоаси сафида жами 139 та ўйинда майдонга тушган. Шу кўрсаткич билан у мамлакат тарихида энг кўп ўйин ўтказган футболчилар рўйхатида 5-ўринни эгаллаб турибди. Бу борада мутлақ етакчи Лионель Месси ҳисобланади. Унинг ҳисобида терма жамоа либосида 207 ўйин мавжуд.

Эслатиб ўтамиз, аввалроқ журналист Эрнан Кастильо Лионель Месси Аргентина миллий терма жамоасидаги фаолиятини якунлаганини маълум қилганди.