Осиёда COVID-19 яна жонланди. Ҳукуматлар ниқоб тақишга чорламоқда

Хитой, Сингапур ва Таиланд коронавируснинг янги тўлқинига дуч келди, бу уч мамлакатда юз минглаб COVID-19 ҳолатлари қайд этилган, Таиландда камида 46 киши ҳалок бўлган. Бу ҳақда Япониянинг “Nikkei Asia” журнали хабар берди.

Маълум қилинишича, Таиландда жорий йилнинг январь ойидан май ойининг ўрталарига қадар 187 минг 31 та COVID-19 касаллиги қайд этилган. Шу билан бирга, 18-24 май кунлари 53 минг 597 та ҳолат аниқланган.

Инфекциянинг энг кўп ҳолатлари Бангкокда қайд этилган ва бунга қисман апрель ойида бўлиб ўтган Сонгкран байрами (Таиланд янги йили) айбдор. Шифокорларнинг фикрига кўра, байрам пайтида сув билан ўйналган ўйинлар вирус тарқалишига сабаб бўлган.

Хитой касалликларни назорат қилиш ва олдини олиш марказининг маълумотларига кўра, 28 апрелдан 4 майгача давлат шифохоналарида ўтказилган барча COVID тестларининг 15,8 фоизи ижобий синовдан ўтган. Бу 24-30 март ҳафталарига нисбатан 6,3 фоизга кўп дегани.

Апрель ойида Хитойда 168 минг 507 та ҳолат тасдиқланган, шу жумладан 340 та оғир ҳолат, тўққиз нафар бемор вафот этган. Хитой ҳукумати фуқароларни янги эпидемиянинг олдини олиш учун узоқ масофаларга саёҳат қилишда ниқоб кийишга чақирган.

Хитойлик COVID-19 мутахассиси Чжун Наньшань Хитойда энг фаол айланиб юрадиган XDV штамми эканлигини айтган. Вирусологнинг таъкидлашича, олимлар коронавируснинг ўзгарувчанлигидан чарчаган. Чжун юқори хавфли одамларни, айниқса 65 ва ундан катта ёшдаги одамларни янада жиддий ҳимоя чораларини кўришга чақирган. У июнь ойи охирида касалланиш камайишини кутмоқда.

Сингапур расмийлари май ойи бошланишидан бир ҳафта олдин COVID-19 ҳолатлари сони 14 минг 200 тани ташкил этганини эълон қилган. Бир ҳафта олдин бу кўрсаткич 111 мингта ҳолатни ташкил этган. Худди шу даврда COVID билан касалхонага ётқизилганларнинг ўртача кунлик сони 102 дан 133 гача кўтарилган.

Жаҳон соғлиқни сақлаш ташкилоти (ЖССТ) бутун дунё бўйлаб 28 кун ичида (11 майгача) аниқланган 91 минг 583 та COVID ҳолати ҳақида хабар берган. Энг кўп ҳолатлар Таиландда аниқланган, ундан кейин Бразилия, Британия, Греция ва Франция. 

Эслатиб ўтамиз, аввалроқ АҚШ маъмурияти COVID-19 лабораториядан келиб чиққани бўйича янги далилларни ўз ичига олган махсус интернет саҳифани ишга туширган эди. Унда Хитойнинг Ухан шаҳридаги лабораторияни асосий манба сифатида кўрсатувчи фикрлар илгари сурилган.