Олимлар дунёдаги энг ноёб қон гуруҳини аниқлади

Франциянинг қон билан ишлаш агентлигида (Etablissement Français du Sang) олимлар дунёдаги энг ноёб қон турини аниқлади. Бу ҳақда “Sciencealert” хабар берди.

“Gwada negative” деб номланган бу янги қон гуруҳи ҳозирча фақат битта инсонда Гваделупа оролидан бўлган француз аёлда аниқланган.

Бу кашфиёт 15 йил аввал, 2011 йилда аёл операция олдидан оддий тиббий текширувдан ўтаётганида, қонида “ғалати антитана” аниқлангач бошланган. Аммо ўша вақтда илмий технологиялар бу ҳодисани чуқур таҳлил қилишга имкон бермаган.

2019 йилга келиб, олимлар генетик кетма-кетликни юқори аниқликда ўрганиш технологияси (high-throughput DNA sequencing) ёрдамида бу аёлда мавжуд бўлган қон турининг илгари номаълум бўлган генетик мутация асосида юзага келганини аниқлаган. Аёл бу ноёб қон турини отаси ва онасидан олган – иккиси ҳам бир хил мутацияга эга бўлган.

Бу қон гуруҳи жорий йилнинг июнь ойида Миланда бўлиб ўтган Халқаро қон трансфузияси жамияти (ISBT) томонидан расмий тарзда дунёнинг 48-қон гуруҳи тизими сифатида эътироф этилган. 

EFS вакиллари бу каби янги қон гуруҳларини аниқлаш ноёб қон турларига эга беморлар учун тиббий хизмат сифатини оширишга хизмат қилишини таъкидламоқда.

Олимлар энди “Gwada negative” қон турига эга бошқа инсонларни топиш учун изланишни давом эттирмоқда.

Эслатиб ўтамиз, аввалроқ  Япониянинг Нара тиббиёт университети профессори Ҳироми Сакаи бошчилигидаги олимлар гуруҳи янги турдаги, исталган гуруҳдаги беморларга қуйилиши мумкин бўлган сунъий қон ишлаб чиққанди.