Оқ уй яқинида отишма содир бўлди (видео)

АҚШнинг Вашингтон шаҳри марказида, Оқ уй яқинида отишма юз берди. Бу ҳақда АҚШ Махфий хизмати Х ижтимоий тармоғида хабар берди.

Махфий хизматнинг маълумотларига кўра, ҳодиса оқибатида камида бир киши яраланган. Яраланган шахснинг аҳволи ҳозирча номаълум.

Отишма 15-кўча ва Мустақиллик проспекти кесишмасида содир бўлган. Бу жой Вашингтондаги монумент ҳамда АҚШ Капитолий биноси яқинида жойлашган ҳудуд ҳисобланади.

Маълумотларга кўра, АҚШ Президенти Дональд Трамп ҳодиса вақтида Оқ уй ичида кичик бизнес вакиллари билан учрашув ўтказаётган бўлган ва чиқиш тўхтатилмаган.

Махфий хизмат ходимлари Оқ уйни вақтинча ёпган, ҳудудда журналистлар йиғилган ва улар брифинг залига олиб кирилган.

Шунингдек, Фавқулодда хизматлар яраланган шахсни касалхонага етказган, яна бир ўсмирга енгил жароҳат бўйича ёрдам кўрсатилгани ҳам айтилмоқда.

Вашингтон полицияси ҳудудни тўлиқ ўраб олган ва атрофдаги йўллар бир неча соатга ёпилган.

“Al Jazeera” мухбири Алан Фишер эса Оқ уй атрофи тўлиқ ўраб олинганини хабар қилди. Унинг айтишича, журналистлар брифинглар залига йиғилган.

Эслатиб ўтамиз, 26 апрелга ўтар кечаси Washington Hilton меҳмонхонасидаги банкет залида ҳам отишма содир бўлганди. 31 ёшли, Калифорнияда яшовчи ўқитувчи Аллен меҳмонхонада хона банд қилган ва зал кириш қисмида АҚШ Махфий хизмати ходимига қарата ўқ узган. У воқеа жойида қўлга олинган. У ерда Трамп ва унинг рафиқаси ҳам бўлган.

Кейинроқ Трамп ушбу ҳужум Эрон билан боғлиқ эмаслигини тахмин қилган.