Имомўғли жосуслик иши бўйича ҳам ҳибсга олинди

Туркия халқаро жиноий суди Истанбулнинг собиқ мэри ва мухолифатдаги “Жумҳурият Халқ” партияси етакчиларидан бири Экрем Имомўғлини “сиёсий жосуслик”да айблаб, ҳибсга олиш ордерини чиқарди. Бу ҳақда “Cumhuriyet” хабар берди.

Имомўғли билан бирга “Tele1” телеканали бош муҳаррири Мердан Янардаг ҳамда Имомўғлининг маслаҳатчиси ва сайлов кампанияси раҳбари Нежати Ўзкан ҳам жосусликда айбланиб ҳибсга олинган.

Прокуратура маълумотига кўра, уларга фуқароларнинг шахсий маълумотларини хорижий давлатларнинг разведка ходимларига етказишда айблов қўйилган.

Маҳаллий ОАВнинг ёзишича, улар 2019 йилги Истанбул мэри сайловлари пайтида сайловчиларнинг махфий маълумотларини ноқонуний тарзда тўплаб, профиль яратиш орқали стратегия ишлаб чиққанликда гумон қилинмоқда. Прокуратуранинг маълум қилишича, Istanbul Senin номли илова орқали хорижга 4,7 миллион кишининг шахсий ва жойлашуви ҳақидаги маълумотлар юборилган.

Нашрнинг ёзишича, тергов жорий йилнинг июль ойида жосусликда гумонланиб, ҳибсга олинган Ҳюсейин Гюн фаолияти билан боғлиқ. Унинг телефонидан Исроил фуқаролари ва террорчилик гуруҳлари билан алоқада бўлиши мумкин бўлган шахсларнинг паспорт суратлари топилган. Шунингдек, у чет эл консулликлари ходимлари билан алоқа ўрнатгани аниқланган.

Эслатиб ўтамиз, аввалроқ Туркия суди Истанбулнинг собиқ мэри Экрем Имомўғлини у Бейликдузу туманига раҳбарлик қилган даврдаги коррупция иши бўйича оқлаганди. Экрем Имомўғли ва яна олти киши устидан иш 2023 йил январь ойида қўзғатилган. Айбловга кўра, сиёсатчи 2015 йилда Бейликдузу тумани ҳокими лавозимида ишлаган чоғида тендер натижаларини сохталаштиришда иштирок этган. Бунинг ортидан эса унга уч йилдан етти йилгача қамоқ жазоси таҳдид солаётганди.
 
Қайд этиш жоиз, илк бор Экрем Имомўғли ва унинг матбуот бўйича маслаҳатчиси Мурат Онгун 19 март куни коррупцияга қарши ўтказилган махсус операция доирасида қўлга олиниб, судга олиб келинган эди. Шундан сўнг, мамлакат бўйлаб норозилик намойишлари бошланди.

Туркия Президенти Ражаб Тойиб Эрдўған бу вазиятга муносабат билдириб, мухолифатни Имомўғли ҳибсга олишини сиёсийлаштиришда айблади. Орадан кўп ўтмай, Туркия суди Экрем Имомўғлини ҳибсга олиш ҳақида қарор чиқарди. Шаҳар мэри лавозимини мухолифат партиясининг вакили Нури Аслан эгаллади. Июль ойида эса Истанбул собиқ мэрига прокурорни ҳақорат қилгани учун 20 ойлик ҳақиқий озодликдан маҳрум этиш жазоси тайинлангани маълум бўлди.