Одамлар мени Мессига ўхшатиб, дастхат сўрашарди – машҳур хонанда

Россиялик хонанда Сергей Лазарев ўзининг ташқи кўриниши Аргентина терма жамоаси ҳужумчиси Лионель Мессига ўхшатилиши ҳақида сўзлаб берди. Бу ҳақда хонанда “Sport-Express” нашрига берган интервьюсида сўз очди.

Унинг айтишича, бу каби таққослашлар анча йиллардан буён давом этиб келмоқда.

“Мени Месси билан кўп марта таққослашган. Бизнинг ўхшашлигимизни кўрсатадиган суратлар ҳам анчадан бери интернетда тарқалади. Ҳатто чет элга борганимда, одамлар мени Месси деб ўйлаб, суратга тушиш ва дастхат сўрашган”, дейди Лазарев.

Хонанданинг айтишича, у 2026 йилги Жаҳон чемпионати финалини ҳам томоша қилади. Бунинг асосий сабаби ўғлининг футболга бўлган қизиқиши экан.

“Ўғлим футболнинг ҳақиқий мухлиси. У бутун оиламизга футболни севдирди. Ҳозир ҳатто бувиси ҳам ўйинларни кузатади. Унинг энг севимли футболчиси Килиан Мбаппе. Ўғлим “Реал Мадрид” мухлиси, Жаҳон чемпионатида эса Франция терма жамоасини қўллаб-қувватлади. Жамоа мусобақани тарк этганида эса жуда хафа бўлди. Биз ҳам унинг сабабидан Мбаппени қўллаб-қувватладик”, дейди у.

Лазаревнинг сўзларига кўра, финалда оила аъзолари Аргентина терма жамоасига мухлислик қилади.

“Энди ҳамма Аргентина ёки Испанияни қўллаб-қувватлаяпти. Мен эса Аргентина учун мухлислик қиламан. Ахир, менга ўхшаш инсон — Месси ўша жамоада ўйнаяпти. Шунинг учун ҳам, ҳазил тариқасида айтганда, “эгизак акам”ни қўллаб-қувватлайман”, дейди Сергей Лазарев.

Маълумот учун, Месси ва унинг жамоаси эртага, 19 июль куни Жаҳон чемпионати финалида Испанияга қарши майдонга тушади.