Норозилик намойишлари тўлиқ назорат остида – Ароқчи

Эрондаги норозиликлар устидан тўлиқ назорат ўрнатилган. Бу ҳақда мамлакат Ташқи ишлар вазири Аббос Ароқчи маълум қилди.

Унинг сўзларига кўра, мамлакат бўйлаб кечаётган намойишлар ҳозирда “тўлиқ назорат қилинмоқда”.

“Iran International” нашрининг ёзишича, Ароқчи Теҳрон сўнгги пайтларда Эронда содир этилган террорчилик ҳаракатларига АҚШ ва Исроилнинг алоқадорлигини тасдиқловчи кенг кўламли далилларга эга эканини айтган.

“Бизда АҚШ ва Исроилнинг Эрондаги сўнгги кунлардаги террорчилик ҳужумларига алоқадорлигини кўрсатувчи кўплаб ҳужжатлар ва далиллар бор”, деган у.

Хусусан, вазир АҚШнинг собиқ давлат котиби Майк Помпеонинг изоҳларига ишора қилган. Ароқчининг айтишича, Помпео “Моссад агентлари тартибсизликлар иштирокчилари билан бирга бўлганини ва ушбу террорчилик ҳаракатига раҳбарлик қилганини” тан олган.

Эрон ТИВ раҳбари, шунингдек, Ғарб давлатларини танқид қилиб, улар террорчиларни эмас, балки Эрон полициясини қоралаётганини айтган.

Қайд этиш жоиз, 2025 йил декабрь ойи охиридан бери Эронда кенг кўламли норозилик намойишлари давом этмоқда. Акция иштирокчилари сиёсий тузумни ўзгартиришни талаб қилмоқда. Ҳуқуқни ҳимоя қилувчи ташкилотлар маълумотларига кўра, камида 544 киши ҳалок бўлган. Эрон расмийлари норозилик намойишларини ташкил этишда АҚШ ва Исроилни айбламоқда.

Эслатиб ўтамиз, аввалроқ Эроннинг сўнгги шоҳи Муҳаммад Ризо Паҳлавийнинг ўғли, мухолиф Ризо Паҳлавий мамлакатда давом этаётган норозилик намойишлари янги босқичга ўтаётганини айтиб, эронликларга уларнинг ёлғиз эмаслигини ва яқин вақт ичида четдан ёрдам келишини маълум қилганди.