Ногиронлиги бўлган шахсларни ишга олганларга субсидия бериш тартиби белгиланди
Жамият
−
21 Апрель 2022 4767
Ногиронлиги бўлган шахсларни ишга қабул қилган иш берувчиларга ҳар бир ходим учун базавий ҳисоблаш миқдорининг1,5 баравари (405 минг сўм) миқдорида субсидия берилади. Бу ҳақда Ўзбекистон Ҳукуматининг “Ногиронлиги бўлган шахсларни ишга қабул қилган иш берувчиларга Бандликка кўмаклашиш давлат жамғармаси маблағлари ҳисобидан субсидия бериш тартиби тўғрисида”ги қарори низомида келтирилган.
Низомга кўра, бунда иш берувчи ногиронлиги бўлган шахсни ишга қабул қилгандан кейин субсидия олиш учун Туман (шаҳар) аҳоли бандлигига кўмаклашиш марказига зарур ҳужжатларни илова қилган ҳолда мурожаат қилади.
Туман (шаҳар) аҳоли бандлигига кўмаклашиш маркази ҳужжатларни уч иш кунида ўрганиб чиқади ва ўрганиш натижаларига кўра субсидия ажратиш (ажратишни рад этиш) тўғрисида қарор қабул қилади.
Ижобий қарор қабул қилинган тақдирда, субсидия ҳар ой учун кейинги ойда (6 ой давомида) иш берувчига тўлаб берилади. Ҳар ой якунида ишга қабул қилинган ногиронлиги бўлган шахсларнинг ҳақиқатдан ишлаётганлиги мониторинг қилиб борилади.
Қарорга мувофиқ, ногиронлиги бўлган шахсларни ишга қабул бюджет ташкилотлари, давлат корхоналари, устав капиталида давлат улуши 50 фоиз ва ундан ортиқ бўлган юридик шахсларга субсидия берилмайди.
Live
Барчаси