Ниғматилла Йўлдошев яна 5 йилга Бош прокурорликда қолди (видео)

Бугун, 21 июнь куни Ўзбекистон Республикаси Бош прокурори Ниғматилла Йўлдошев лавозимга қайта тайинланди. Бу ҳақда Ўзбекистон Республикаси Олий Мажлис Сенатининг 53-ялпи мажлисида қарор қабул қилинди.

Билдирилишича, Ниғматилла Йўлдошев 2019 йилдан буён Ўзбекистон Бош прокурори вазифасида ишлаб келаётганди. Ўзбекистон қонунчилигига кўра, Бош прокурорнинг ваколат муддати 5 йилни ташкил қилади. Ниғматилла Йўлдошев ваколат муддати тугаганлиги сабабли Бош прокурор лавозимини кўриб чиқиш масаласи Сенатда муҳокама қилиниб, у лавозимга қайта тайинланди.

Маълумот учун, Ниғматилла Йўлдошев 1962 йил 5 ноябрь куни Тошкент шаҳрида туғилган. Тошкент давлат университетининг юриспруденция факультетини тамомлаган.

У фаолияти давомида қуйидаги лавозимларда ишлаган:

• 1987-1991 йилларда – Олмалиқ прокуратураси катта терговчиси;
• 1991-1993 йилларда – Тошкент шаҳар Юнусобод тумани терговчиси;
• 1993-1994 йилларда – Тошкент шаҳар прокуратураси катта терговчиси;
• 1994-1999 йилларда – Ўзбекистон Бош прокуратурасида бошқарма бошлиғи;
• 1999-2000 йилларда – Бош прокуратура Тергов бош бошқармаси бошлиғи;
• 2000-2003 йилларда – Бош прокуратура Ички хавфсизликни таъминлаш инспекцияси бошлиғи;
• 2003-2006 йилларда – Ўзбекистон Республикаси Президентининг ҳуқуқни муҳофаза қилувчи ва назорат идоралари фаолиятини мувофиқлаштириш бўйича Давлат маслаҳатчиси хизматининг прокуратура идоралари фаолияти масалалари бўйича етакчи инспектори;
• 2006-2008 йилларда – Ўзбекистон Республикаси Бош прокуратураси ҳузуридаги Солиқ, валютага оид жиноятларга ва жиноий даромадларни легаллаштиришга қарши курашиш департаменти бошлиғи;
• 2008-2011 йилларда – Ўзбекистон Республикаси Бош прокурорининг ўринбосари;
• 2011-2015 йилларда – Ўзбекистон Республикаси Адлия вазири;
• 2015 йил 22 январдан 2019 йил 20 июнгача Сенат аъзоси, Сенат Раиси;

2016 йил 2 сентябрда Ўзбекистон Республикасининг Биринчи Президенти Ислом Каримовнинг вафотидан кейин Конституцияга кўра, Олий Мажлис палаталарининг қарори билан Ўзбекистон Президенти вазифасини вақтинча бажарувчи этиб тайинланганди. 2016 йил 8 сентябрь куни эса Президент ваколатларини бажариш масъулиятини вақтинчалик Бош вазир Шавкат Мирзиёевга топширишини эълон қилган.

2019 йил 20 июнь куни Ўзбекистон Республикаси Президенти Шавкат Мирзиёев фармони билан Бош прокурор этиб тайинланган.