Netanyaxuning qayerdaligi noma’lumligicha qolmoqda

Bugun, 2 mart kuni Eron tomonidan Isroil hududidagi hukumat ob’ektlariga uyushtirilgan navbatdagi raketa hujumlaridan so‘ng Isroil bosh vaziri Binyamin Netanyaxuning ahvoli noma’lumligicha qolmoqda. Rasmiy manbalar hozircha bu borada batafsil ma’lumot bergani yo‘q.

Eron Islom inqilobi qo‘riqchilari korpusi (IIQK) Jamoatchilik bilan aloqalar bo‘limi tarqatgan bayonotda Isroil Bosh vaziri qarorgohi hamda Isroil havo kuchlari shtab-kvartirasi raketalar bilan nishonga olingani ma’lum qilindi. Bayonotda mazkur ob’ektlar Eron Qurolli kuchlari tomonidan qattiq zarbalarga uchragani qayd etilgan.

IIQK ushbu hujumlarni Eron tomonidan amalga oshirilgan o‘ninchi zarba to‘lqini doirasida o‘tkazilganini bildirgan. Hujumlarning oqibatlari, talofatlar va infratuzilmaga yetgan zarar hajmi haqida mustaqil manbalar tomonidan tasdiqlangan ma’lumotlar hozircha e’lon qilinmagan.

Isroil axborot agentliklarining xabar berishicha, raketa hujumlaridan so‘ng Binyamin Netanyaxu Bayt-Shemesh shahriga rejalashtirilgan tashrifini bekor qilgan. U oxirgi marta besh soat oldin bir necha daqiqalik videomurojaat yo‘llagan va shundan so‘ng umuman ko‘rinish bermagan. Rasmiylar ham Netanyaxuning xavfsizligi yuzasidan hech qanday izoh bermagan. Mamlakat ichida xavfsizlik choralarining kuchaytirilgani, hukumat a’zolari va harbiy rahbariyat maxsus boshqaruv markazlariga ko‘chirilgani haqida xabarlar tarqalmoqda.

Eslatib o‘tamiz, avvalroq Eron Islom inqilobi qo‘riqchilari korpusi Binyamin Netanyaxuning idorasiga zarba bergani haqida xabar qilingan edi.

AQSH–Isroil–Eron urushi

Kecha, 28 fevral kuni Isroil kutilmagan vaqtda Eronga qarata havodan zarbalar yo‘lladi. Ushbu zarbalar Eronning muhim ob’ektlari – Prezident qarorgohi, davlat idoralari va yadro inshootlariga tekkani iddao qilinmoqda. Eronning “Mehr” axborot agentligi Tehrondagi Eron razvedka binosiga ham hujum qilinganini yozgan. Dastlabki manbalarga ko‘ra, Eronga o‘ttizdan ortiq raketalar yo‘llangan bo‘lishi mumkin.

Oradan biroz vaqt o‘tib Isroil Mudofaa kuchlari Eronga hujumni rasman tasdiqlagan. Shuningdek, Mudofaa vazirligi Isroil fuqarolaridan xavfsiz joyga yashirinishni so‘ragan. Mamlakatda shoshilinch ravishda favqulodda holat e’lon qilingan.

Shu orada AQSH Prezidenti Donald Tramp Eron bo‘yicha operatsiyalar haqida 8 daqiqalik bayonot bergan va unda Eronga qilingan hujumda AQSHning ishtirok etganini tasdiqlagan. Uning qayd etishicha, Eronga qilingan harbiy opreatsiyalar Amerika xalqini himoya qilish uchun amalga oshirilmoqda. U o‘z bayonotida eronliklarni amaldagi tuzumni ag‘darishga chaqirgan. Tramp Eron harbiy xizmatchilariga taslim bo‘lishni va buning evaziga “immunitet” olishni taklif qildi yoki “muqarrar o‘lim”ni tanlashlari mumkinligini aytgan.

Qolaversa, barcha voqealarni bir chetdan kuzatib turgan Eron sobiq valiahd shahzodasi Rizo Pahlaviy ham Eron xalqiga murojaat qilib, mamlakat uchun hal qiluvchi lahzalar kelganini ta’kidlagan. Shuningdek, u bu so‘nggi jang ekanini va unda Eron xalqi Islom Respublikasi tuzumi ustidan g‘alaba qozonishini ta’kidlagan.

Oradan ko‘p vaqt o‘tmay endi Eron Isroil davlati hududiga qarata zarba yo‘llashni boshladi.

Isroil Bosh vaziri Binyamin Netanyaxu ham hujumlarni tasdiqlab, bayonot bergan. Unga ko‘ra, Isroil va AQSHning Eronga qarshi qo‘shma operatsiyasi Eron terror rejimi keltirib chiqarayotgan tahdidni bartaraf etishga qaratilgan. Netanyaxu maxsus murojaatida so‘nggi 47 yil davomida Eron rahbariyati Isroil va AQSHga qarshi ochiq tahdidlar qilgan hamda mintaqada zo‘ravonlik siyosatini yuritganini aytgan.

Avvalroq, Eron davlat televideniyesi Xomanaiy Isroil va AQSH tomonidan o‘ldirilganini xabar qilgan edi. Eronning “Tasnim” axborot agentligi ma’lumotlariga ko‘ra, u kecha, 28 fevral kuni ertalab o‘z ishxonasida o‘ldirilgan. Oyatullohning vafoti munosabati bilan mamlakat bo‘ylab 40 kunlik umumxalq motami va 7 kunlik umumxalq dam olish kunlari e’lon qilindi.

Shuningdek, Eron hududiga uyushtirilgan hujum chog‘ida Oyatullohning oila a’zolaridan to‘rt kishi – qizi, kuyovi, nabirasi va kelinlaridan biri ham halok bo‘lgan.

Qayd etish joiz, Eron Islom inqilobi qo‘riqchilari korpusi Islom Respublikasi Oliy rahbari Oyatulloh Ali Xomanaiyning vafoti tasdiqlanganidan so‘ng, mamlakat “Qurolli kuchlari tarixidagi eng shiddatli hujum operatsiyasi” boshlanganini ma’lum qilgandi.

Shundan so‘ng, Eron Islom inqilobi qo‘riqchilari korpusi mamlakat Isroil va AQSHga qarshi yangi hujumlar boshlanganini e’lon qildi.