Нетаньяху Қуддусни Исроил пойтахти сифатида тан олинишига уринмоқда

Исроил Бош вазири Биньяминь Нетаньяху кеча, 9 март куни Италиядан Қуддусни мамлакат пойтахти сифатида тан олишни сўрашини айтди. Бу ҳақда “Reuters” хабар берди.

Қайд этилишича, Нетаньяху кеча, 9 март куни уч кунлик ташриф билан Италияга келган. У бугун, 10 март куни Италия Бош вазири Жоржия Мелони билан учрашади. Сафар олдидан Италия ОАВга интервью берган Исроил Бош вазири расмий Римдан Қуддусни Исроилнинг пойтахти сифатида тан олишни сўрамоқчилигини маълум қилган.

“Мен Рим ҳам АҚШ каби Қуддусни уч минг йиллик яҳудий халқининг пойтахти сифатида тан оладиган вақт келди, деб ҳисоблайман”, деган Нетаньяху.

Шунингдек, у Римни табиий газ билан таъминлаш истиқболини ошириб, Италия билан иқтисодий алоқаларни кучайтириш истагини билдирган. Италия ўтган йили Украинада уруш бошлангани ортидан Россиядан импорт қиладиган энергия манбаларини алмаштириш мажбуриятини олган. Исроил эса бу вазиятда ўз газини таклиф қилмоқда. Эвазига Италия Қуддусни Исроил пойтахти сифатида тан олишини сўраяпти.

Маълумот учун, Исроил парламенти 1980 йилда “тўлиқ ва бирлашган” Қуддус шаҳрини Исроил пойтахти деб эълон қилиш тўғрисидаги қонунни қабул қилган. Бироқ БМТ шаҳарнинг шарқий қисмини босиб олинган деб ҳисоблайди. Шунинг учун ҳам кўпчилик давлатлар томонидан Қуддус Исроил пойтахти сифатида тан олинмайди. Шаҳарнинг мақоми ҳам халқаро нормаларга кўра, Исроил ва Фаластин ўртасидаги можаро музокаралар орқали ҳал қилинмагунга қадар баҳсли саналади. Бироқ 2018 йилда АҚШ ўз элчихонасини Қуддусга кўчириб, бу борада Исроилни қўллади.

Италия ҳам АҚШ ортидан борадими ёки йўқ, бу ҳозирча номаълум. Бироқ Италия Бош вазири Жоржия Мелони лавозимга келишидан олдин берган интервьюларидан бирида АҚШнинг ўз элчихонасини Қуддусга кўчириш ҳақидаги қарорига амал қилиш нияти йўқлигини айтган.