НАТОнинг кенгайиши Европа хавфсизлигига таҳдид – Беларусь ТИВ

Беларусь Ташқи ишлар вазирлиги НАТОнинг кенгайиши Европа хавфсизлигига таҳдид солишини маълум қилди. Бу ҳақда “Белта” нашри хабар берди. 

Қайд этилишича, Европа Иттифоқининг хавфсизлик ва ташқи ишлар бўйича Олий вакили Жозеп Боррелнинг Россиянинг Беларусь ҳудудига тактик ядровий қуролларни жойлаштириш ҳақидаги қарорига нисбатан берган баёнотига жавобан Беларусь ташқи ишлар вазирлиги НАТОнинг янги кучларини жойлаштириши ва кенгайишини “Европа хавфсизлигига таҳдид”, деб атаган. 

“НАТОнинг янги кучларини Беларусь чегараларига жойлаштириши ва иттифоқнинг Шимолий Европада янада кенгайиши масъулиятсиз эскалация ва Европа хавфсизлигига таҳдид солувчи асосий омиллардир”, дейилади мамлакат Ташқи ишлар вазирлиги баёнотида.

Аввалроқ, вазирлик сўнгги икки ярим йил ичида Беларусь АҚШ, Буюк Британия ва унинг НАТОдаги иттифоқчилари, шунингдек, Европа Иттифоқи давлатлари томонидан мисли кўрилмаган сиёсий, иқтисодий ва ахборот босимига дучор бўлганлигини таъкидлаганди. 

“Ушбу ҳолатлар ва улардан келиб чиқадиган миллий хавфсизлик соҳасидаги қонуний ташвишлар ва хавфларни ҳисобга олган ҳолда, Беларусь ўз хавфсизлиги ва мудофаа қобилиятини мустаҳкамлаш учун мажбурий жавоб чораларини кўрмоқда. Беларусь ва Россиянинг ҳарбий ҳамкорлиги халқаро ҳуқуққа мувофиқ амалга оширилади. Махсус ўқ-дорилар билан қуролланган самолётларни бошқаришга қодир бўлган Беларусь учувчиларини тайёрлаш, бундай самолётларни модернизация қилиш, шунингдек, Беларусь ҳудудида ядровий қуролларни жойлаштириш, тегишли технологиялардан фойдаланиш ҳеч қандай тарзда Ядро қуролини тарқатмаслик тўғрисидаги шартноманинг 1- ва 2-моддаларига зид эмас”, дейилади баёнотида.

Эслатиб ўтамиз, аввалроқ Киев Москванинг хавфли қарори ортидан БМТ Хавфсизлик кенгашини чақиришни талаб қилганди. Россия Ҳарбий-саноат комиссияси раисининг биринчи ўринбосари Дмитрий Медведев эса дунёда ядровий тўқнашув тобора яқинлашиб бораётганини таъкидлаган.

Нодиржон Мадаминов