НАТО Украина учун кўп йиллик ҳарбий ёрдам дастурини қабул қилади

Жорий йилнинг июль ойида бўлиб ўтадиган Вильнюс саммитида НАТО етакчилари Украинани Ғарб йўналиши бўйича тўлиқ қайта қуроллантириш учун унга кўп йиллик ҳарбий ёрдам дастурини қабул қилади. Бу ҳақда бугун, 18 май куни НАТО Бош котиби Йенс Столтенберг Лиссабондаги матбуот анжуманида маълум қилди.

“Вильнюсдаги саммитда альянс давлатлари Украинага унинг совет типидаги доктрина ва қуроллардан Ғарб доктриналарига тўлиқ ўтишини таъминлашга қаратилган кўп йиллик ҳарбий ёрдам дастурини қабул қилади”, деган Столтенберг.

Шунингдек, НАТО Бош котиби Вильнюсдаги саммитнинг иккинчи муҳим қарори Европани ҳарбийлаштириш бўйича кейинги чора-тадбирларни тасдиқлаш бўлишини таъкидлаган. Хусусан, у НАТО давлатлари мудофаа харажатларини оширишни давом эттириш мажбуриятини олиши ва қонуний равишда ЯИМнинг 2 фоизини ҳарбий харажатлари учун мақсадли эмас, балки минимал даражага айлантириши кераклигини қайд этган. 

Таъкидлаш жоизки, НАТО давлатлари ва уларнинг ҳамкорлари учун асосий қурол етказиб берувчи АҚШ ҳарбий-саноат мажмуаси ҳисобланади. Айни пайтда Европа Иттифоқи Европа саноатини ҳарбийлаштириб, ўқ-дорилар ишлаб чиқаришни кўпайтиришга эътибор қаратмоқда. Еврокомиссия ҳам снарядлар ва ракеталар ишлаб чиқаришни рағбатлантириш учун ЕИ бюджетидан 500 миллион евро ва Европа тинчлик жамғармасидан 1 миллиард еврогача маблағ ажратишга қарор қилган.

Европанинг ички бозор бўйича комиссари Тьерри Бретон Европадаги ҳарбий заводларнинг кенгайишини назорат қилади. Унинг сўзларига кўра, ЕИ давлатларининг бевосита мақсади снарядлар ишлаб чиқаришни йилига 1 миллионга етказишдир. Шунингдек, у ўзининг барча чиқишларида Европа Комиссияси Европа бизнесига ракета ва снарядларга бўлган талаб яқин келажакда пасаймаслигига кафолат беришини таъкидлайди.