НАТО шарқий қанотни мустаҳкамлашда муваффақиятга эришди – ОАВ 

НАТО шарқий қанотни мустаҳкамлашда муваффақиятга эришганини эълон қилди — Словакия, Венгрия, Руминия ва Болгариядаги тўртта янги кўп миллатли жанговар гуруҳлар ҳарбий тайёргарликнинг биринчи даражасига етган. Бу ҳақда Шимолий Атлантика альянси вакилига таяниб, DPA агентлиги хабар берган.  

Таъкидланишича, дастлаб НАТО шарқий қанотда тузилган жанговар гуруҳларнинг аниқ таркиби ва сони ҳақида хабар бермаган. 

Бироқ, нашрнинг ёзишича, жорий йил 21 мартдаги маълумотларга кўра, ўша пайтда Словакияда Германия, Нидерландия, Чехия ва АҚШ каби мамлакатлардан 2100 нафар аскар бўлган. Венгрияда Хорватиядан 800 нафар, Болгарияда АҚШдан 900 нафар, Руминияда эса Франция, Бельгия, Италия ва АҚШдан 3300 нафар аскар жойлаштирилган. 

Таъкидланишича, янги жанговар гуруҳлар Россиянинг Украинага ҳужуми фонида жиловлаш ва мудофаа қобилиятини янада оширишга қаратилган. Агентликка кўра, шу пайтгача НАТОнинг доимий кўп миллатли бўлинмалари фақат Болтиқбўйи давлатлари — Эстония, Латвия ва Литвада, шунингдек, Польшада бўлган. 

Одатда, бундай жанговар гуруҳлар сони 1000 дан 1200 гача аскарни ташкил қилади, бироқ охирги пайтларда Украинадаги воқеалар туфайли уларнинг сони сезиларли даражада ошган. 

НАТОнинг март ойи охирида бўлиб ўтган фавқулодда саммити якунлари бўйича эълон қилинган баёнотга кўра, Россиянинг Украинадаги “махсус операциясига” жавобан НАТО Европада қўшимча тўртта кўпмиллатли жанговар гуруҳлар тузади. Ҳужжатда қайд этилишича, “Россиянинг ҳаракатларига жавобан НАТО мудофаа режалари фаоллаштирилди, НАТО жавоб кучлари элементлари жойлаштирилди ва НАТОнинг шарқий қанотига 40 минг аскар жойлаштирилди”. 

Бундан ташқари, Болгария, Венгрия, Руминия ва Словакияда қўшимча тўртта кўп миллатли жанговар гуруҳлар ташкил этилмоқда. Шу билан бирга, альянснинг қадамлари “огоҳлантирувчи, мутаносиб ва   инқирозни кучайтиришга қаратилмагани” таъкидланган.