НАТО 36 йил ичида энг йирик ҳарбий машғулотларини ўтказмоқда

НАТО 24 январь куни Steadfast Defender-24 машқларини бошлади. Бу Шимолий Атлантика альянсининг 1988 йилдан буён энг йирик ҳарбий машғулотлари бўлади. Бу ҳақда “Reuters” хабар берди. 

Steadfast Defender-24 АҚШ ҳарбий-денгиз кучларининг Gunston Hall амфибия ҳужум кемасининг Виржиния штатининг Норфолк портидан жўнаб кетиши билан бошланди, кейинчалик у Атлантика океани бўйлаб сузиб ўтади. Бу машқдаги биринчи тактик манёврдир.

Январь ойи охиригача Канада ҳарбий-денгиз кучларининг Charlottetown кемаси Галифакс портидан Европага сузиб кетадиган машғулотларга қўшилади.

"Steadfast Defender-24 бизнинг бирлигимиз, кучимиз ва бир-биримизни, қадриятларимиз ва қоидаларга асосланган халқаро тартибни ҳимоя қилиш учун қатъиятлилигимизнинг ёрқин намойиши бўлади", дея изоҳлади Иттифоқдош кучларнинг Европадаги Олий қўмондони, генерал Кристофер Каволи.

Режада бир неча йил давом этган Steadfast Defender-24 машқи НАТОнинг Европа мудофаасини мустаҳкамлаш учун Шимолий Америка ва Иттифоқнинг бошқа қисмларидан кучларни тезлик билан жойлаштириш қобилиятини намойиш этади.

Машқлар давомида НАТО, эҳтимол, Россиядан бўлган ҳужумга жавоб бериш учун мудофаа режаларини амалга оширишни машқ қилади. НАТО ўз баёнотида Россия Федерациясини тилга олмаган.

“Бироқ альянснинг асосий стратегик ҳужжатида Россия НАТО аъзолари хавфсизлигига энг муҳим ва тўғридан-тўғри таҳдид деб аталади”, деб ёзади нашр.

Машғулотларда 90 мингга яқин ҳарбий хизматчи, ҳарбий-денгиз кучларининг 50 та кемаси, 80 та самолёт ва 1100 дан ортиқ жанговар техника иштирок этади.