Намойишлар ортидан Колумбия университети раҳбари ҳам истеъфога чиқди

АҚШдаги Колумбия университети раҳбари Минуш Шафик Ғазодаги уруш туфайли институтда норозилик намойишлари бошланганидан тўрт ой ўтиб, ўз лавозимидан истеъфога чиқди. Бу ҳақда “The Guardian” нашри хабар берди. 

Қайд этилишича, Шафик хонимнинг истеъфоси Нью-Йорк шаҳридаги хусусий Айви Лигаси тадқиқот университетлари иттифоқига кирувчи Колумбия университетида раҳбар лавозимни эгаллаганидан бир йил ўтиб, кузги семестр бошланишига бир неча ҳафта қолганида содир бўлди. Шафик хоним энди Ғазодаги урушга қарши намойишлар фонида истеъфога чиққан Айви Лигасидаги учинчи университет раҳбаридир.

Кеча, 15 август куни Шафик хоним талабалар ва ўқитувчиларга электрон почта орқали жамиятдаги турли қарашларни енгиш қийин бўлган нотинч даврни кузатганини ёзди.

“Бу давр жамиятимиздаги бошқалар каби менинг оиламга ҳам катта зарар етказди. Ёз бўйи мулоҳаза юритдим.  Қарорим Колумбияга олдиндаги қийинчиликларни енгиб ўтишга ёрдам беради, деб ўйлайман”, деган университет  раҳбари ўз мактубида.

Хабарда айтилишича, Колумбия университетида Ирвинг тиббиёт марказининг бош ижрочи директори Катрина Армстронг муваққат раҳбар сифатида ишлайди.

“Мен академик тамойилларни қўллаб-қувватлайдиган ва ҳаммага адолат ва раҳм-шафқат билан муносабатда бўладиган йўлдан боришга ҳаракат қилдим. Ўзимни, ҳамкасбларим ва талабаларни таҳдид ва ҳақорат мавзусига айланиб қолиш жамият учун ҳам, мен учун ҳам, раҳбар сифатида ҳам, шахсий даражада ҳам қайғули бўлди”, деб ёзди Шафик.

Шунингдек, талабаларнинг Исроилнинг ҲАМАСга қарши урушини қандай олиб бораётганидан ғазаби Яқин Шарқда содир бўлаётган воқеалар бўйича кампусдаги қизғин мунозаралар билан курашаётган университет раҳбарлари учун бир қанча саволлар туғдирди. Гарвард университети, Пенсильвания университети ва Массачусетс технология институти раҳбарлари Вакиллар палатаси Таълим ва ишчи кучи қўмитаси олдида гувоҳлик беришди.

Маълумот учун, Шафик хоним асли мисрлик машҳур иқтисодчи бўлиб, илгари Жаҳон банки, Халқаро валюта жамғармаси ва Англия банкида ишлаган. Бир муддат Лондон Иқтисодиёт мактаби раҳбари лавозимида ҳам фаолият юритган.

Эслатиб ўтамиз, ўтган ойда Колумбия университети талабалари полициянинг кескин қаршилигидан бир ой ўтиб, яна Фаластинни қўллаб-қувватлаш митингини бошлаганди. Фаластин тарафдори бўлган талабалар кампусда янги лагерь ташкил қилиб, уни “Рафаҳ қўзғолони” деб аташди.

Зебо Туробжонова