Нагатомо бешта Жаҳон чемпионатида ўйнаган илк осиёликка айланди

Япония терма жамоаси ҳимоячиси Юто Нагатомо бешта Жаҳон чемпионатида майдонга тушган тарихдаги илк осиёлик футболчига айланди. Бу ҳақда “Devdiscourse” нашри хабар берди.

39 ёшли футболчи 2026 йилги Жаҳон чемпионати гуруҳ босқичининг учинчи турида Швецияга қарши учрашувда ушбу натижани қайд этди. Нагатомо баҳснинг 75-дақиқасида захирадан майдонга тушди. Ўйин 1:1 ҳисобидаги дуранг билан якунланди.

Шу тариқа, Нагатомо Жаҳон чемпионатларида беш марта иштирок этган футболчилар қаторидан жой олди. Ундан аввал бу натижа мексикаликлар Антонио Карбахал, Андрес Гуардадо ва Рафаэль Маркес, германияликлар Лотар Маттеус ва Мануэль Нойер ҳамда хорватиялик Лука Модрич томонидан қайд этилган эди.

Португалиялик Криштиану Роналду, аргентиналик Лионель Месси ва мексикалик Гильермо Очоа эса олтитадан Жаҳон чемпионатида иштирок этган.

Маълумот учун, Нагатомо 2011 йил Япония терма жамоаси билан Осиё кубогида ғолиб чиққан. У миллий жамоа сафида 146 та учрашувда майдонга тушган бўлиб, бу кўрсаткич бўйича фақат 152 ўйин ўтказган Ясухито Эндодан ортда қолмоқда.