Мудофаа ишлар органлари фуқаро ходимларининг иш ҳақи оширилади

Ўзбекистонда мудофаа ишлар органлари фуқаро ходимларининг иш ҳақи миқдори жорий йил 1 июлдан 20 фоизга, 2027 йил 1 январдан яна 50 фоизга оширилади. Бу ҳақда Ўзбекистон Мудофаа вазири Шуҳрат Холмуҳаммедов “Ахборот 24” дастурида маълум қилди.

Кеча, 8 июнь куни Президент Шавкат Мирзиёев мудофаа соҳасидаги айрим масалалар юзасидан тақдимот билан танишган. Мудофаа вазирига кўра, Тошкент ва Самарқанд шаҳарларида хизмат ўтаётган ҳарбий хизматчиларга тураржой ижараси учун тўланадиган пул компенсацияси 25 фоизга оширилмоқда.

Шу билан бирга, мудофаа ишлар органлари фуқаро ходимларининг иш ҳақи миқдори жорий йил 1 июлдан 20 фоизга, 2027 йил 1 январдан яна 50 фоизга оширилиши белгиланган.

Тақдимот якунида Шавкат Мирзиёев қўшинларнинг жанговар шайлиги ва тайёргарлигини ошириш, бу борада қўшинларга илғор тажрибаларни татбиқ этиш бўйича устувор вазифаларни белгилаб берган.  

Шунингдек, ҳарбий таълим тизимидаги ислоҳотларни изчил давом эттириш, аскарларни касбга ўқитиш ва олий таълим муассасаларига тайёрлаш, бунинг учун уларга муносиб шароитлар яратиб бериш юзасидан аниқ топшириқлар қўйган.

Эслатиб ўтамиз, аввалроқ Ўзбекистонда 16 ёшга тўлган ва ID-карта олган ўғил болалар тўғрисидаги маълумотлар Ички ишлар вазирлигининг ахборот тизимидан олиниб, уларни автоматик тарзда ҳарбий ҳисобга қўйиш тартиби жорий этилиши хабар қилинган эди.