МТС “ўзбек иши” доирасида ўз манфаатларини ҳимоя қилмоқчи

Россия алоқа оператори МТС компанияни Ўзбекистонда ноқонуний ҳатти-ҳаракатларда айблаётган инвесторларнинг АҚШда компанияга қарши очилган иш доирасида ўз манфаатларини ҳимоя қилишини маълум қилди. Бу ҳақда ТАСС хабар берди.

“МТСнинг маълум қилишича, компания ва унинг бир нечта бошқарувчиларига қарши АҚШдаги Нью-Йорк штати округ судига жамоавий даъво очилди. Компания айбловни кўриб чиқяпти ва ўз манфаатларини ҳимоя қилиш ниятида”, дейилади Қимматли қоғозлар бўйича комиссия (SEC) сайтида жойлаштирилган ҳужжатда.

Бундан ташқари, компания қарши даъво билан чиқиши мумкинлигини ҳам инкор қилмаган.

Аввалроқ, АҚШнинг Rosen Law юридик фирмаси МТСга қарши даъво билан чиққанди. Rosen Law 2014 йил 19 мартдан 2019 йил 7 мартгача бўлган даврда Россия компанияси қимматли қоғозларини сотиб олган барча инвесторлар унга қўшилиши мумкинлигини айтган.

Даъволар МТС компаниясининг Ўзбекистонда коррупцияга алоқадорлиги бўйича очилган иш билан боғлиқ. Якунда оператор АҚШ ҳукуматига жами 850 миллион доллар тўлаб бериши белгиланган.

Rosen Law’нинг иддаосига кўра, МТС компанияси 420 млн доллар миқдорида пора беришига тўғри келган коррупцион схемага аралашиб қолганини инвесторлардан яширган. Шунингдек, бозорга суриштирувларнинг эҳтимолий оқибатлари кўламини сездирмаган.

АҚШ маҳкамалари 2014 йилдан бери операторнинг Ўзбекистондаги бизнеси бўйича МТСга нисбатан коррупцияга қарши суриштирув олиб борган. АҚШ Адлия вазирлигининг таъкидлашича, Vimpelcom, МТС ва Telia компаниялари Ўзбекистоннинг Биринчи Президенти Ислом Каримовнинг яқин қариндошларига пора бериш ва бунинг эвазига мамлакат телекоммуникация бозорига кириш учун сохта компаниялар ва қалбаки шартномалардан фойдаланган. VEON суриштирув якунлари бўйича 2016 йилда 795 миллион доллар, Telia - 965 миллион доллар жарима тўлади.

2014 йилда МТС низоларни бартараф этиб, Ўзбекистон ҳукумати билан халқаро келишувга эришгач, Universal Mobile Systems (UMS) устав капиталининг 50,01, фоизини текинга олди. Бироқ 2016 йил августда МТС ўзинининг барча улушини UMS’га рамзий 1 долларга сотди. Шу билан бирга, компания бу қарор АҚШ Адлия вазирлигининг текширувлари билан боғлиқ эмаслигини айтган.