Москвада бензин танқислиги сабаб узун навбатлар юзага келди

Россия пойтахти Москвада бензин танқислиги сабаб ҳайдовчилар автоёнилғи қуйиш шохобчаларида соатлаб навбат кутмоқда. Бу ҳақда “Meduza” хабар берди.

Нашрнинг ёзишича, ёнилғи инқирози Россиянинг аксарият ҳудудларини, жумладан, Москвани ҳам қамраб олган. Сўнгги кунларда кўплаб АЁҚШларда узун навбатлар кузатилмоқда. Фақат дизель ёнилғиси сотилаётган шохобчаларда эса бундай тирбандлик мавжуд эмас.

Айрим АЁҚШ ходимлари фото ва видео тасвирга олишни тақиқламоқда. Улар буни автоёнилғи қуйиш шаҳобчалари “махсус объект” ҳисобланиши билан изоҳлаган.

Нашр маълумотларига кўра, “Лукойл” тармоғига қарашли АЁҚШларнинг аксарияти ё вақтинча ёпилган, ёки фақат дизель ёнилғисини сотмоқда. “Нефтьмагистраль” тармоғида эса бензиннинг барча турлари мавжуд эмас. “Газпром”нинг айрим АЁҚШлари ишлаётган бўлса-да, уларда AI-92 бензини тугаган ёки фақат дизель сотилмоқда.

Энг барқарор вазият “Роснефть” тармоғида кузатилмоқда. Бу ерда кўплаб АЁҚШларда бензин мавжуд, аммо бир харидорга кўпи билан 50 литрдан сотилмоқда. Шу билан бирга, айрим шаҳобчаларда AI-92 бензини танқислиги ҳам қайд этилган.

Нашрнинг ёзишича, “Роснефть”нинг баъзи АЁҚШлари янги ёқилғи партиясини кутиш учун вақти-вақти билан тахминан бир соатга фаолиятини тўхтатмоқда. Шунга қарамай, ҳайдовчилар бензин сотуви қайта тикланишини кутиб, навбатларда қолишда давом этмоқда.

Эслатиб ўтамиз, аввалроқ Россия ички бозордаги ёнилғи тақчиллиги сабабли Қозоғистон билан тахминан 50 минг тонна ҳажмдаги AI-92 автобензинини импорт қилиш имконияти бўйича музокаралар олиб бораётгани ҳақида хабар берилганди.