Мирзиёев Сирдарёга поездда кетмоқда

Бироз аввал, Ўзбекистон Республикаси Президенти Шавкат Мирзиёев бугун, 14 март куни сайхунободликларнинг яшаш шароитлари билан танишиш учун Сирдарёга йўл олаётгани ҳақида хабар берган эдик. Давлат раҳбари Сирдарёга ташрифини “Ўзбекистон темир йўллари” АЖ поездида амалга оширмоқда. 

Сафарда унга Ўзбекистон мусулмонлари идораси раиси, муфтий Нуриддин Холиқназаров ҳамроҳлик қилмоқда. Давлат раҳбари ва муфтий ўртасида кечган суҳбатда диний-маърифий йўналишлардаги ишлар, муборак Рамазон ойининг фазилатлари ҳақида сўз борган. 

Президент Шавкат Мирзиёев муқаддас Рамазон ойини юксак даражада ўтказиш, мамлакатдаги тинчликни қадрлаш ва меҳр-оқибат муҳитини мустаҳкамлаш бўйича ўз фикрларини билдирган. Инсон қадрини улуғлаш мақсадига мувофиқ, халқ манфаатларини таъминлаш, муҳтож инсонларни қўллаб-қувватлаш давом эттирилишини айтган.

Маълумот учун, одатда Президент Шавкат Мирзиёев ҳудудларга ташрифни самолётда амалга оширар эди. Президентнинг вилоятларга поездда бориши биринчи марта кузатилмоқда.