Мирзиёев Хитойга боради

Ўзбекистон Республикаси Президенти Шавкат Мирзиёев Хитойда Япония агрессиясига қарши Хитой халқининг қаршилик кўрсатиш урушидаги ғалаба ва Иккинчи жаҳон уруши тугаганининг 80 йиллиги муносабати билан бўлиб ўтадиган тадбирларда иштирок этиш учун Хитойга боради. Ўзбекистон раҳбарининг ташрифи ҳақида ҳали расмий Тошкент маълумот бермаган бўлса-да, Хитойнинг расмий ахборот агентлиги “Синьхуа” Мирзиёевнинг ташрифини тасдиқлади. 

Қайд этилишича, Пекинда ўтадиган тантаналарда 26 мамлакат етакчилари ва ҳукумат раҳбарлари иштирок этади.

Баёнотда тилга олинган биринчи хорижий давлат раҳбари Россия Президенти Владимир Путин, иккинчиси Шимолий Корея етакчиси Ким Чен Индир. 

Пекиндаги байрамларда, шунингдек, Камбоджа, Вьетнам, Лаос, Индонезия, Малайзия, Мўғулистон, Покистон, Непал, Мальдив ороллари, Қозоғистон, Ўзбекистон, Тожикистон, Қирғизистон, Туркманистон, Беларусь, Озарбайжон, Арманистон, Эрон, Конго Республикаси, Зимбабве, Сербия, Словакия, Куба ва Мьянма давлат ҳамда ҳукумат раҳбарлари иштирок этади. 

3 сентябрь куни Пекинда кенг кўламли парад бўлиб ўтади. Маросим 70 дақиқа давом этади, унда Хитой Халқ-озодлик армияси анъанавий қўшин турлари ва қуролли кучларнинг янги бўлимлари – 45 экипаж, илғор ракета технологиялари, танклар, самолётлар ва миллий ишлаб чиқаришнинг учувчисиз тизимларини тақдим этади.

Маълумот учун, Хитой халқининг япон агрессиясига қарши қаршилик кўрсатиш уруши, иккинчи Хитой-япон уруши деб ҳам аталади, 1931 йилда Япониянинг Манчурияга бостириб кириши билан бошланди ва 1937 йилда кенг кўламли урушга айланиб, 1945 йилда Япониянинг таслим бўлиши ва Иккинчи жаҳон урушининг тугаши билан якунланди. Хитой фашизм устидан ғалаба қозонишда, Япония қўшинларини узоқ йиллар давомида ушлаб туришда ва халқаро антифашистик фронтни шакллантиришда муҳим роль ўйнагани айтилади. 

Эслатиб ўтамиз, Ўзбекистон раҳбари сўнгги бор жорий йилнинг январь ойида 23-25 январь кунлари Хитойга давлат ташрифини амалга оширган эди.