Mirziyoyev Britaniya sobiq bosh vaziri Toni Blerni qabul qildi

O‘zbekiston Respublikasi Prezidenti Shavkat Mirziyoyev bugun, 10 aprel kuni Buyuk Britaniyaning sobiq bosh vaziri, Global o‘zgarishlar instituti raisi Toni Blerni qabul qildi. Bu haqda Prezident matbuot xizmati xabar berdi.

Qayd etilishicha, muloqot davomida O‘zbekistonning ushbu nufuzli tuzilma bilan amaliy hamkorligini rivojlantirish masalalari ko‘rib chiqilgan.

“Toni Bler Yangi O‘zbekistonni barpo etish bo‘yicha amalga oshirilayotgan islohotlarning borishi va ko‘lamini yuksak baholadi, ularni yanada ilgari surish doirasida zarur ekspert-maslahat ko‘magini ko‘rsatishga tayyorligini bildirdi”, deyiladi xabarda.

Shuningdek, iqtisodiyot tarmoqlariga yirik strategik investorlarni jalb qilish, texnologik modernizatsiya, raqamlashtirish va sun’iy intellektni joriy etishni jadallashtirish, ustuvor sohalarda qo‘shma dastur va loyihalarni amalga oshirishga qaratilgan chora-tadbirlar hamkorlikning boshqa asosiy yo‘nalishlari sifatida qayd etilgan.

Ma’lumot uchun, Buyuk Britaniyaning sobiq bosh vaziri Toni Bler tomonidan 2016 yilda tashkil etilgan institut xalqaro notijorat tashkilot hisoblanadi. U turli mamlakatlarga barqaror va innovatsion rivojlanishning yangi modellarini ishlab chiqishda, iqlim o‘zgarishi va boshqa zamonaviy tahdidlarga qarshi kurashishda ko‘maklashadi.

Eslatib o‘tamiz, o‘tgan yili 12 noyabr kuni  Baku shahrida COP-29 sammiti doirasida Shavkat Mirziyoyev Toni Bler bilan uchrashgandi. O‘shanda O‘zbekiston-Britaniya munosabatlarini yanada rivojlantirish istiqbollari, shuningdek, Toni Bler rahbarlik qilayotgan Global o‘zgarishlar instituti bilan amaliy hamkorlikni yo‘lga qo‘yish masalalari muhokama qilingan.