Мессининг “Барселона”га қайтиши ҳақидаги гаплар ҳақиқатга тўғри келмайди – Лапорта

Испаниянинг “Барселона” президенти Жоан Лапорта клубнинг собиқ футболчиси Лионель Мессининг “Камп Ноу”га кутилмаган ташрифи ҳақида гапирди. У аргентиналик футболчининг ташрифидан хабари бўлмаганини тан олди ва Мессининг жамоага қайтиши эҳтимолини рад этди. Бу ҳақда AS нашри хабар берди.

“Бу жуда ёқимли воқеа бўлди. Месси бу клубнинг ғурури, у ўз уйига қайтганини ҳис қилди. Бизнинг муносабатларимиз яхши. Месси бу ерда севилади ва стадион унинг уйи эканини билади. У дунёдаги энг гўзал ўлпонни олишга лойиқ”, деди Лапорта  Мессининг “Камп Ноу”га ташрифи ҳақида.

Шунингдек, Лапорта Мессининг футболчи сифатида “Барселона”га қайтиши эҳтимолини қатъий рад этди:

“Лионель Мессининг футболчи сифатида “Барселона”га қайтиши ҳақида гапириш ҳақиқатга тўғри келмайди”,  дея таъкидлади клуб раҳбари.

“Барселона” клуби президенти  “Камп Ноу” стадионини  қурилиш жараёни ҳақида ҳам фикр билдирди. Унга кўра, янги стадион режалаштирилганидек барқарор давом этмоқда ва тез орада жамоа ўз уйига қайтади.

“Лимак компанияси лойиҳани аъло даражада олиб бормоқда. Қурилиш сифати юқори, барча хавфсизлик қоидаларига амал қилинмоқда. Бу Жанубий Европадаги энг йирик стадион лойиҳасидир”,  деди Лапорта.

Эслатиб ўтамиз, аввалроқ “Барселона” жамоасининг собиқ футболчиси Лионель Месси янги “Камп Ноу”га ташриф буюриб, ўзининг Instagram’ида “қачондир қайтиб келаман” дея изоҳ қолдирган эди.